തിരുവനന്തപുരം: ഏഷ്യന്‍ ഗെയിംസില്‍ സ്വര്‍ണ്ണം നേടിയ കായികതാരങ്ങള്‍ക്ക് 25 ലക്ഷം പാരിതോഷികം പ്രഖ്യാപിച്ച് സര്‍ക്കാര്‍. മികച്ച പ്രകടനം കാഴ്ചവെച്ച മലയാളി കായികള്‍ക്കെല്ലാം സര്‍ക്കാര്‍ പാരിതോഷികം ലഭിക്കും. വെള്ളി മെഡല്‍ ജേതാക്കള്‍ക്ക് 19 ലക്ഷം രൂപയും വെങ്കല മെഡല്‍ ജേതാക്കള്‍ക്ക് 12.5 ലക്ഷം രൂപ വീതവുമാണ് പാരിതോഷികമായി ലഭിക്കുക. ഏഷ്യന്‍ ഗെയിംസില്‍ മികച്ച പ്രകടനം കാഴ്ച വെച്ച കായികതാരങ്ങളെ വ്യാഴാഴ്ച നടക്കുന്ന ചടങ്ങില്‍ അനുമോദിക്കുമെന്ന് സര്‍ക്കാര്‍ അറിയിച്ചിരുന്നു.
അനുമോദനച്ചടങ്ങ് സംഘടിപ്പിക്കുന്നതിനു മുന്നോടിയായി ഇന്നുചേര്‍ന്ന മന്ത്രിസഭാ യോഗത്തിലാണ് കായിക താരങ്ങള്‍ക്ക് പാരിതോഷികം പ്രഖ്യാപിച്ചുകൊണ്ടുള്ള തീരുമാനം. അതേസമയം നേരത്തേ ഗെയിംസില്‍ അഭിമാനാര്‍ഹമായ നേട്ടങ്ങള്‍ സ്വന്തമാക്കിയിട്ടും സംസ്ഥാന സര്‍ക്കാരിന്റെ ഭാഗത്തുനിന്ന് വേണ്ടത്ര പരിഗണന ലഭിച്ചില്ലെന്ന് പിആര്‍ ശ്രീജേഷ് ഉള്‍പ്പടെയുള്ള താരങ്ങള്‍ ആരോപിച്ചിരുന്നു. ഇതിന് പിന്നാലെയാണ് മെഡല്‍ ജേതാക്കളെ ആദരിക്കാനും പാരിതോഷികം നല്‍കാനും സര്‍ക്കാര്‍ തീരുമാനിച്ചത്.
