ഗാസ: തങ്ങൾ മരിക്കും എന്ന് അറിഞ്ഞുകൊണ്ടു തന്നെയാണ് പലസ്തീനിലെ എല്ലാ ഡോക്ടർമാരും നഴ്സുമാരും ഗാസ മുനമ്പിൽ താമസിച്ചിരുന്നത്. എന്നാൽ എങ്ങനെയും അവിടെ തുടരുക എന്നല്ലാതെ മറ്റൊരു മാർഗം തിരഞ്ഞെടുക്കാൻ അവർക്കാകുമായിരുന്നില്ലെന്ന് യുദ്ധത്തിന്റെ നിന്ന് രക്ഷപ്പെട്ട ഒരു യുഎസ് നഴ്സ് പറഞ്ഞു. ഡോക്‌ടേഴ്‌സ് വിത്തൗട്ട് ബോർഡേഴ്‌സിന്റെ നഴ്സ് ആക്‌റ്റിവിറ്റി മാനേജർ എമിലി കല്ലഹാൻ സിഎൻഎന്റെ ആൻഡേഴ്‌സൺ കൂപ്പറിന്റെ അഭിമുഖത്തിലാണ് ഇക്കാര്യം പറഞ്ഞത്. “ഗാസയിൽ ഇപ്പോൾ സുരക്ഷിതമായ സ്ഥലമില്ല,” എമിലി പറയുന്നു.
കഴിഞ്ഞ ബുധനാഴ്ച ഗാസയിൽ നിന്ന് ഒഴിപ്പിച്ചതിന് ശേഷം മിസ് കല്ലഹാൻ വാരാന്ത്യത്തിൽ യുഎസിലേക്ക് മടങ്ങി. തിരിച്ചുവരാൻ എങ്ങനെ തോന്നുന്നു എന്ന ചോദ്യത്തിന്, അവരുടെ മറുപടി, “ഞാൻ എന്റെ കുടുംബത്തോടൊപ്പം വീട്ടിലാണെന്നും 26 ദിവസത്തിന് ശേഷം ആദ്യമായി സുരക്ഷിതത്വം തോന്നുന്നുവെന്നും എനിക്ക് ആശ്വാസമുണ്ട്. എന്നാൽ അതിൽ എന്തെങ്കിലും ഒരു സന്തോഷം കണ്ടെത്താൻ എനിക്ക് കഴിയുന്നില്ല. കാരണം ഒരുപാട് ആളുകളെ ഉപേക്ഷിക്കേണ്ടി വന്നതിന്റെ ഫലമായാണ് ഞാൻ സുരക്ഷിതയായിരിക്കുന്നത്.
സുരക്ഷാ പ്രശ്‌നങ്ങൾ കാരണം 26 ദിവസത്തിനുള്ളിൽ തങ്ങൾക്ക് ഏകദേശം 5 തവണ സ്ഥലം മാറ്റേണ്ടി വന്നതായി കല്ലഹാൻ പറഞ്ഞു. “ഞങ്ങൾ താമസിച്ച സ്ഥലങ്ങളിലൊന്ന് കമ്മ്യൂണിസ്റ്റ് പരിശീലന കേന്ദ്രമായിരുന്നു. അവിടെ കുടിയിറക്കപ്പെട്ട 35,000 പേർ ഉണ്ടായിരുന്നു. മുഖത്തും കഴുത്തിലും കൈകാലുകളിലാകെ വൻതോതിൽ പൊള്ളലേറ്റ കുട്ടികളും ഉണ്ടായിരുന്നു. ആശുപത്രികൾ തിങ്ങിനിറഞ്ഞതിനാൽ അവരെയെല്ലാം ഉടൻ ഡിസ്ചാർജ് ചെയ്തു,” നഴ്സ് പറഞ്ഞു
ഇസ്രായേലിന്റെ വ്യോമാക്രമണത്തിൽ കുടിയൊഴിപ്പിക്കപ്പെട്ടവർക്ക് അഭയം നൽകുന്ന ദുരിതാശ്വാസ ക്യാമ്പുകളുടെ അവസ്ഥയെക്കുറിച്ചും അവർ വിവരിച്ചു. 50,000-ത്തിലധികം ആളുകളുള്ള ഒരു ക്യാമ്പിൽ നാല് ടോയ്‌ലറ്റുകളാണ് ഉള്ളത്. ഒരു ദിവസം നാല് മണിക്കൂർ മാത്രമാണ് വെള്ളം വിതരണം ചെയ്യുന്നത്. അവരിൽ പലരുടേയും മുഖത്ത് പൊള്ളലുകളും ശരീരഭാഗങ്ങളിൽ ഭാഗികമായി മുറിവുകളുമുണ്ട്. ‘ദയവായി നിങ്ങൾക്ക് സഹായിക്കാമോ?’ എന്ന് പറഞ്ഞ് മാതാപിതാക്കൾ കുട്ടികളെ ഞങ്ങളുടെ അടുത്തേക്ക് കൊണ്ടുവരുന്നു. സഹായിക്കാൻ ഞങ്ങളുടെ പക്കൽ സാധനങ്ങളൊന്നുമില്ല,”അവർ പറഞ്ഞു.
ആളുകൾ തങ്ങളെ ഉപദ്രവിക്കാൻ തുടങ്ങിയതിനാൽ അവർക്ക് ക്യാമ്പുകളിലൊന്നിൽ നിന്ന് പുറത്തുപോകേണ്ടിവന്നുവെന്ന് നഴ്സ് പറഞ്ഞു. “ചുറ്റും പ്രിയപ്പെട്ടവരെ നഷ്ടപ്പെടുന്ന നിരാശരായ ആളുകൾ. അവർക്ക് ദേഷ്യവും നിരാശയുമാണ്. അവർ എന്നെ ചൂണ്ടി ‘അമേരിക്കൻ’ എന്ന് അലറിവിളിക്കും. ഞങ്ങൾ ഇസ്രയേലികളാണോ എന്നറിയാൻ അവർ ഹീബ്രുവിൽ കാര്യങ്ങൾ വിളിച്ചുപറയും. ഞങ്ങളുടെ ദേശീയ ജീവനക്കാർ രാജ്യദ്രോഹികളോ അല്ലെങ്കിൽ അറബികളായി നടിക്കുന്നവരോ ആണെന്ന് അവർ ആരോപിച്ചു.”
തങ്ങളുടെ പലസ്തീനിയൻ സഹപ്രവർത്തകൻ മുഴുവൻ സമയവും തങ്ങൾക്കൊപ്പമായിരുന്നുവെന്ന് മിസ് കല്ലഹാൻ പറഞ്ഞു. “ഞങ്ങൾ അവരോട് പറഞ്ഞു, നിങ്ങൾ ഇവിടെ നിൽക്കണം എന്നില്ല. അപ്പോൾ അവർ പറഞ്ഞു, ‘നിങ്ങളും കുടുംബമാണ്’, ‘ഞങ്ങൾ എവിടെയും പോകുന്നില്ല’.”
