ഗാസ സിറ്റി: പലസ്തീൻ എൻക്ലേവിൽ ഇസ്രായേൽ സൈന്യം വ്യോമ, കര ആക്രമണം വ്യാപകമാക്കിയതിന് പിന്നാലെ ഇസ്രായേൽ ആക്രമണങ്ങളെ പൂർണ ശക്തിയോടെ നേരിടാൻ ഗാസയിലെ തങ്ങളുടെ അംഗങ്ങൾ സജ്ജമാണെന്ന് ഹമാസ് അറിയിച്ചു.
ഗാസയിൽ ആക്രമണം ശക്തമാക്കിയതായി ഇസ്രായേൽ റിപ്പോർട്ട് ചെയ്തതിനെ തുടർന്ന് തങ്ങളുടെ പോരാളികൾ ഇസ്രായേൽ അതിർത്തിക്കടുത്തുള്ള പ്രദേശങ്ങളിൽ ഇസ്രായേൽ സൈനികരുമായി ഏറ്റുമുട്ടുകയാണെന്ന് ഗാസ ഭരിക്കുന്ന പലസ്തീൻ ഗ്രൂപ്പ് നേരത്തെ പറഞ്ഞിരുന്നു.
“കഴിഞ്ഞ കുറച്ച് ദിവസങ്ങളായി നടത്തിയ ആക്രമണങ്ങൾക്ക് പുറമേ, കരസേന ഇന്ന് രാത്രി അവരുടെ പ്രവർത്തനങ്ങൾ വിപുലീകരിക്കുന്നു,” ഇസ്രായേൽ സൈനിക വക്താവ് റിയർ അഡ്മിറൽ ഡാനിയൽ ഹഗാരി വെള്ളിയാഴ്ച വൈകുന്നേരം ഒരു ടെലിവിഷൻ വാർത്താ സമ്മേളനത്തിൽ പറഞ്ഞു.
ഹമാസ് കുഴിച്ച തുരങ്കങ്ങളിലും മറ്റ് അടിസ്ഥാന സൗകര്യങ്ങളിലും ഇസ്രായേൽ വ്യോമസേന വ്യാപകമായ ആക്രമണം നടത്തുന്നുണ്ടെന്ന് അദ്ദേഹം പറഞ്ഞു.
ഗാസയുടെ വടക്കുകിഴക്കൻ പട്ടണമായ ബെയ്ത് ഹനൂനിലും മധ്യപ്രദേശമായ അൽ-ബുറൈജിലും തങ്ങളുടെ പോരാളികൾ ഇസ്രായേലി സൈനികരുമായി ഏറ്റുമുട്ടുകയാണെന്ന് ഹമാസിന്റെ സായുധ വിഭാഗം അറിയിച്ചു.
“ഇസ്രായേലിന്റെ) ആക്രമണത്തെ പൂർണ്ണ ശക്തിയോടെ നേരിടാനും അതിന്റെ നുഴഞ്ഞുകയറ്റങ്ങളെ പരാജയപ്പെടുത്താനും അൽ-ഖസ്സാം ബ്രിഗേഡുകളും എല്ലാ പലസ്തീൻ പ്രതിരോധ സേനകളും പൂർണ്ണമായും സജ്ജമാണ്,” ഹമാസ് ശനിയാഴ്ച രാവിലെ പ്രസ്താവനയിൽ പറഞ്ഞു. “നെതന്യാഹുവിനും അദ്ദേഹത്തിന്റെ പരാജയപ്പെട്ട സൈന്യത്തിനും ഒരു സൈനിക വിജയവും നേടാൻ കഴിയില്ല.”
അതേസമയം, ഇസ്രയേൽ സൈന്യം കര വഴിയുള്ള ആക്രമണം കടുപ്പിച്ചതോടെ ഗാസയിൽ മരണസംഖ്യ ഉയരുകയാമ്. ഈ മാസം 7 മുതൽ ഇതുവരെ 7326 പലസ്തീൻകാർ കൊല്ലപ്പെട്ടതായി ആരോഗ്യമന്ത്രാലയം അറിയിച്ചു. ഇസ്രയേൽ കരസേന, വ്യോമസേനയുടെ പിന്തുണയോടെ വടക്കൻ ഗാസയിൽ വീണ്ടും മിന്നലാക്രമണം നടത്തി. വ്യോമാക്രമണം കിഴക്കൻ ഗാസയിലേക്കു കൂടി വ്യാപിപ്പിക്കുകയും ചെയ്തു.
