നെടുങ്കണ്ടം: ഇടുക്കി നെടുങ്കണ്ടത്ത് പ്രായപൂർത്തിയാകാത്ത പെൺകുട്ടിയെ മദ്യം നൽകി പീഡിപ്പിച്ച യുവാവും സഹായം ചെയ്ത് നൽകിയ സുഹൃത്തുക്കളും പിടിയിൽ. പെൺകുട്ടിയെ ലൈംഗികമായി പീഡിപ്പിച്ച ആഷിഖ്, സഹായിച്ച സുഹൃത്ത് അനേഷ് പ്രായപൂർത്തിയാകാത്ത മറ്റൊരു ആൺ സുഹൃത്ത് എന്നിവരാണ് നെടുങ്കണ്ടം പൊലീസിൻ്റെ പിടിയിലായത്.
പെൺകുട്ടിയുടെ വീടിന് സമീപത്തുള്ള വിജനമായ സ്ഥലത്തെത്തിയ സംഘം മദ്യപിക്കുകയും പെൺകുട്ടിയെ പ്രണയം നടിച്ച് പ്രദേശത്തേക്ക് വിളിച്ചുവരുത്തുകയുമായിരുന്നു. കുട്ടിയുടെ ആൺസുഹൃത്തായ ആഷിഖ് അനേഷിന്റെ ഫോണിൽ നിന്നായിരുന്നു പെൺകുട്ടിയെ വിളിച്ചത്. സ്ഥലത്തെത്തിയ പെൺകുട്ടിക്ക് കൂടിയ അളവിൽ മദ്യം നൽകി. പിന്നീട് പ്രായപൂർത്തിയാകാത്ത യുവാവും അനേഷും വീട്ടിലേക്ക് മടങ്ങി.
സുഹൃത്തുക്കൾ പോയതിനുശേഷം ആഷിഖ് ബോധരഹിതയായ പെൺകുട്ടിയെ ലൈംഗികമായി പീഡിപ്പിച്ചു. ദൃശ്യങ്ങൾ സ്വന്തം മൊബൈലിൽ പകർത്തുകയും ചെയ്തു. ഏറെ വൈകിയും പെൺകുട്ടിയെ കാണാത്തതിനെ തുടർന്ന് വീട്ടുകാർ അന്വേഷണം നടത്തുകയായിരുന്നു.
പെൺകുട്ടിയുടെ മൊബൈലിലേക്ക് വന്ന കാളിലെ നമ്പറിലേക്ക് സഹോദരി തിരിച്ചു വിളിച്ചു. ഫോൺ എടുത്ത ആഷിക്കിന്റെ മറ്റൊരു സുഹൃത്ത് പെൺകുട്ടി ആഷിഖിനൊപ്പം ഉണ്ടാകും എന്ന് പറഞ്ഞു. ഇതിനുശേഷം ഫോൺ കട്ട് ചെയ്ത് ഈ സുഹൃത്ത് ആഷിഖിനെ ഫോണിൽ ബന്ധപ്പെട്ടു. പെൺകുട്ടി അമിതമായി മദ്യം കഴിച്ചെന്നും ബോധരഹിതയായി കിടക്കുകയാണെന്നുമായിരുന്നു ആഷിഖ് സുഹൃത്തിനോട് പറഞ്ഞത്. സഹായിക്കാൻ എത്തണമെന്നും ആവശ്യപ്പെട്ടിരുന്നു. ഇതിന് പിന്നാലെ സുഹൃത്ത് മറ്റൊരാളെയും കൂട്ടി സ്ഥലത്തെത്തിയ ശേഷം പെൺകുട്ടിയെ ബൈക്കിൽ കയറ്റി വീടിനു മുന്നിലെത്തിക്കുകയും വീട്ടുകാരെ വിവരമറിയിച്ച് മടങ്ങുകയുമായിരുന്നു. തുടർന്ന് വീട്ടുകാരാണ് പെൺകുട്ടിയെ ആശുപത്രിയിൽ എത്തിച്ചത്. പിന്നീട് നെടുങ്കണ്ടം പൊലീസിൽ പരാതിപ്പെട്ടു.
ആശുപത്രിയിൽ നടത്തിയ വിശദമായ പരിശോധനയിലാണ് പെൺകുട്ടി പീഡിപ്പിക്കപ്പെട്ടതായി കണ്ടെത്തിയത്. തുടർന്ന് പൊലീസ് പ്രതികളെ പിടികൂടി. മദ്യലഹരിയിൽ ബോധരഹിതയായ പെൺകുട്ടി അപകട നില തരണം ചെയ്‌തെങ്കിലും ഇടുക്കി മെഡിക്കൽകോളജ് ആശുപത്രിയിൽ തീവ്ര പരിചരണ വിഭാഗത്തിൽ ചികിത്സയിലാണ്.
പ്രതിപട്ടികയിലുള്ള 17 കാരൻ മുമ്പ് പോക്‌സോ കേസിലും കഞ്ചാവ് കേസിലും പ്രതിയായിരുന്നു. ഒരുമാസം മുമ്പാണ് ജാമ്യത്തിലിറങ്ങിയത്. സംഭവത്തിന് ശേഷം നാടുവിടാൻ ശ്രമിക്കുന്നതിനിടയിലായിരുന്നു പിടികൂടിയത്. ബലാൽസംഗം പോക്‌സോ നിയമത്തിലെ വിവിധ വകുപ്പുകൾ, പട്ടികജാതി പട്ടികവർക്ക പീഡന നിരോധന നിയമം, ഐ.ടി ആക്ട് തുടങ്ങിയ വകുപ്പുകളാണ് പെൺകുട്ടിയെ പീഡിപ്പിച്ച ആഷികിനെതിരെ ചുമത്തിയിരിക്കുന്നത്. പ്രായപൂർത്തിയാകാത്ത പെൺകുട്ടിക്ക് മദ്യം നൽകിയത് അടക്കമുള്ള വകുപ്പുകൾ മറ്റു രണ്ടു സുഹൃത്തുക്കൾക്കെതിരെയും ചുമത്തിയിട്ടുണ്ട്. പ്രതികളെ കോടതിയിൽ ഹാജരാക്കി. വിശദമായ അന്വേഷണത്തിനായി വീണ്ടും കസ്റ്റഡിയിൽ വാങ്ങുമെന്ന് കട്ടപ്പന ഡി.വൈ.എസ്.പി നിഷാദ് മോൻ പറഞ്ഞു.
