നവകേരള സദസിന്റെ സമ്മേളന വേദിക്ക് സമീപത്തുള്ള കടകളില്‍ ഗ്യാസ് ഉപയോഗിച്ചുള്ള പാചകം പാടില്ലെന്ന വിചിത്ര സര്‍ക്കുലറില്‍ മാറ്റം വരുത്തി പോലീസ്. നവ കേരള സദസ്സ് നടക്കുന്ന രണ്ടു മണിക്കൂര്‍ മാത്രം ഗ്യാസ് ഉപയോഗിക്കരുതെന്നാണ് കച്ചവടക്കാര്‍ക്ക് നല്‍കിയിരിക്കുന്ന പുതിയ നിര്‍ദേശം. ഡിസംബര്‍ ഏഴാം തീയതിയാണ് ആലുവ പ്രൈവറ്റ് ബസ് സ്റ്റാന്‍ഡില്‍ നവകേരള സദസ്സ് നടക്കുന്നത്. ബസ് സ്റ്റാന്‍ഡില്‍ പ്രവര്‍ത്തിക്കുന്ന കടകള്‍ക്കാണ് ആലുവ ഈസ്റ്റ് പൊലീസ് ഗ്യാസ് ഉപയോഗിച്ചുള്ള പാചകം പാടില്ലെന്ന സര്‍ക്കുലര്‍ നല്‍കിയത്.
നവകേരളസദസ്സിന്റെ സുഗമമായ നടത്തിപ്പിനും സുരക്ഷ ഉറപ്പാക്കുന്നതിന്റെയും ഭാഗമായാണ് നിര്‍ദ്ദേശങ്ങളെന്നും പോലീസ് സര്‍ക്കുലറില്‍ വ്യക്തമാക്കിയിരുന്നു. ഡിസംബര്‍ ഏഴിന് ഗ്യാസ് ഉപയോഗിച്ച് പാചകം പാടില്ലെന്നും കച്ചവടക്കാര്‍ ഭക്ഷണം മറ്റിടങ്ങളില്‍ വച്ച് പാചകം ചെയ്തശേഷം കടയില്‍ എത്തിച്ച് വില്‍ക്കണമെന്നുമാണ് പോലീസ് അറിയിച്ചിരുന്നത്. ആലുവ ഈസ്റ്റ് പൊലീസ് പുറത്തിറക്കിയ വിചിത്ര സര്‍ക്കുലര്‍ വിവാദമായതിനെ പിന്നാലെയാണ് മാറ്റം വരുത്തിയിരിക്കുന്നത്.
നവകേരള സദസ്സ് നടക്കുന്ന രണ്ട് മണിക്കൂര്‍ സമയം ഗ്യാസ് ഉപയോഗിച്ച് പാചകം പാടില്ലെന്നാണ് പുതിയ സര്‍ക്കുലറില്‍ പറയുന്നത്. അതേസമയം പരിസരത്ത്
ജോലി ചെയ്യുന്നവരുടെ വ്യക്തിഗത വിവരങ്ങള്‍ നല്‍കണമെന്നും പൊലീസ് നോട്ടീസില്‍ ആവശ്യപ്പെട്ടിരുന്നു. പരിശോധനകള്‍ക്ക് ശേഷം തൊഴിലാളികള്‍ക്ക് സ്റ്റേഷനില് നിന്ന് താല്‍ക്കാലിക തിരിച്ചറിയല്‍ കാര്‍ഡ് നല്‍കുമെന്നും അതിനായി തൊഴിലാളികള്‍ രണ്ട് പാസ്‌പോര്‍ട്ട് സൈസ് ഫോട്ടോയും തിരിച്ചറിയല്‍ രേഖയും നല്‍കണമെന്നും സര്‍ക്കുലറില്‍ ആവശ്യപ്പെടുന്നു. പൊലീസ് നല്‍കുന്ന തിരിച്ചറിയല്‍ കാര്‍ഡ് ഇല്ലാത്തയാളുകളെ ഈ സ്ഥലത്ത് ജോലി ചെയ്യാന്‍ അനുവദിക്കില്ലെന്നും പൊലീസ് വ്യക്തമാക്കിയിരുന്നു.
