ന്യൂഡൽഹി: ലോകത്തിലെ മികച്ച വിദ്യാഭ്യാസ സ്ഥാപനങ്ങളുടെ പട്ടികയിൽ ഇന്ത്യയിൽ നിന്നുള്ള ഒന്നുപോലുമില്ലെന്ന് രാഷ്ട്രപതി ദ്രൗപതി മുർമു. ലോകത്തിലെ ഏറ്റവും പഴക്കമേറിയ വിജ്ഞാന പാരമ്പര്യമുള്ള ഒരു രാജ്യമായ ഇന്ത്യയിൽ നിന്നുള്ള ഒരു വിദ്യാഭ്യാസ സ്ഥാപനവും ഈ പട്ടികയിൽ ഇല്ലെന്നുള്ളത് ഗൗരവകരമായി ചിന്തിക്കേണ്ടതുണ്ടെന്നും ദ്രൗപതി മുർമു ഊന്നിപ്പറഞ്ഞു. ഐഐടി ഖരഗ്പൂരിന്റെ 69-ാമത് കോൺവൊക്കേഷനിൽ സംസാരിക്കവെയാണ് പ്രസിഡന്റ് മുർമു ഇക്കാര്യം പറഞ്ഞത്.
“നമ്മൾ അതിനെക്കുറിച്ച് ചിന്തിക്കേണ്ടതുണ്ട്. മികച്ച വിദ്യാഭ്യാസത്തേക്കാൾ പ്രധാനം റാങ്കിംഗിനായുള്ള ഓട്ടമല്ല. എന്നാൽ മികച്ച റാങ്കിംഗ് ലോകമെമ്പാടുമുള്ള വിദ്യാർത്ഥികളെയും മികച്ച അധ്യാപകരെയും ആകർഷിക്കുക മാത്രമല്ല, രാജ്യത്തിന്റെ പ്രശസ്തി വർദ്ധിപ്പിക്കുകയും ചെയ്യുന്നു, ”അവർ പറഞ്ഞു. ഖരഗ്പൂർ ഐഐടിയോട് ഈ ദിശയിൽ പ്രവർത്തിക്കാനും പ്രസിഡന്റ് മുർമു ആവശ്യപ്പെട്ടു.
സാമൂഹ്യനീതിയും സമത്വവും പ്രോത്സാഹിപ്പിക്കുന്നതിൽ സാങ്കേതികവിദ്യയുടെ പ്രാധാന്യം എടുത്തുപറഞ്ഞ മുർമു സാങ്കേതികവിദ്യയിൽ എല്ലാവർക്കും അവകാശങ്ങൾ ഉണ്ടായിരിക്കണമെന്നും പറഞ്ഞു. “എല്ലാവർക്കും സാങ്കേതികവിദ്യയ്ക്കുള്ള അവകാശം ഉണ്ടായിരിക്കണമെന്ന് ഞങ്ങൾ വിശ്വസിക്കുന്നു. സാങ്കേതികവിദ്യയുടെ ഉപയോഗം സമൂഹത്തിലെ അസമത്വങ്ങൾ വർദ്ധിപ്പിക്കുന്നതിനുപകരം സാമൂഹ്യനീതിയും സമത്വവും പ്രോത്സാഹിപ്പിക്കുന്നതിന് ആയിരിക്കണമെന്നും ഞങ്ങൾ വിശ്വസിക്കുന്നു,” രാഷ്ട്രപതി പറഞ്ഞു.
