ന്യൂഡല്‍ഹി : കഴിഞ്ഞ 5 വര്‍ഷത്തിനിടെ 2 ലക്ഷത്തിലധികം അനധികൃത ഇന്ത്യന്‍ കുടിയേറ്റക്കാരെയാണ് അമേരിക്കന്‍ ഭരണകൂടം നേരിടേണ്ടി വന്നതെന്ന് വിദേശകാര്യമന്ത്രി വി. മുരളീധരന്‍.
2022-23 ലാണ് ഏറ്റവും കൂടുതല്‍ ആളുകള്‍ അനധികൃതമായി അമേരിക്കയിലെത്തിയത്. ഇത്തരത്തിലുള്ള 96,917 കേസുകള്‍ റിപ്പോര്‍ട്ട് ചെയ്തിട്ടുണ്ടെന്ന്, അമേരിക്കന്‍ ഹോംലാന്‍ഡ് സെക്യൂരിറ്റിയില്‍ നിന്നുള്ള വിവരങ്ങളുടെ അടിസ്ഥാനത്തില്‍ വിദേശകാര്യ മന്ത്രാലയം (എംഇഎ) പാര്‍ലമെന്റില്‍ നല്‍കിയ വിശദാംശങ്ങളില്‍ പറയുന്നു.
2018-19ല്‍ 8027, 2019-20ല്‍ 1227, 2020-21ല്‍ 30,662 എന്നിങ്ങനെ അനധികൃത ഇന്ത്യന്‍ കുടിയേറ്റക്കാരെ യുഎസ് അധികൃതര്‍ കണ്ടെത്തിയിട്ടുണ്ട്. 2021-22ല്‍ 63,927 കേസുകളും 2022-23ല്‍ 96,917 കേസുകളും റിപ്പോര്‍ട്ട് ചെയ്യപ്പെട്ടു.
അമേരിക്കന്‍ അധികാരികള്‍ നേരിട്ട അനധികൃത ഇന്ത്യന്‍ കുടിയേറ്റക്കാരുടെ ആകെ എണ്ണം 200,760 ആണ്.
യുഎസ് കസ്റ്റംസ് ആന്‍ഡ് ബോര്‍ഡര്‍ പ്രൊട്ടക്ഷന്‍ വെബ്സൈറ്റില്‍ പ്രസിദ്ധീകരിച്ച ഇമിഗ്രേഷന്‍ സ്ഥിതിവിവരക്കണക്കുകളുടെ അടിസ്ഥാനത്തിലാണ് യുഎസ് അധികാരികള്‍ നേരിടുന്ന അനധികൃത ഇന്ത്യന്‍ കുടിയേറ്റക്കാരുടെ എണ്ണം സംബന്ധിച്ച ഡാറ്റയെന്ന് മുരളീധരന്‍ പറഞ്ഞു. യുഎസ് സാമ്പത്തിക വര്‍ഷം (ഒക്ടോബര്‍ മുതല്‍ സെപ്തംബര്‍ വരെ) പ്രകാരമുള്ള കണക്കുകളാണിത്.
അതേസമയം, യുഎസ് അതിര്‍ത്തി കടക്കുന്നതിനിടെ ജീവന്‍ നഷ്ടപ്പെട്ട ഇന്ത്യന്‍ പൗരന്മാരുടെ എണ്ണം സംബന്ധിച്ച വിശദാംശങ്ങള്‍ ലഭ്യമല്ലെന്നും മന്ത്രി പറഞ്ഞു.
വിദേശത്തുള്ള ഇന്ത്യന്‍ പൗരന്മാരുടെ സുരക്ഷ, ക്ഷേമം എന്നിവയ്ക്കാണ് സര്‍ക്കാര്‍ ഉയര്‍ന്ന മുന്‍ഗണന നല്‍കുന്നതെന്നും വിദേശ ജോലികള്‍ക്കായി ഇന്ത്യന്‍ പൗരന്മാരെ റിക്രൂട്ട് ചെയ്യുന്നത് എമിഗ്രേഷന്‍ ആക്ട് 1983 പ്രകാരം നിയന്ത്രിക്കപ്പെടുന്നുണ്ടെന്നും അദ്ദേഹം വ്യക്തമാക്കി.
നിയമപരമായ കുടിയേറ്റം പ്രോത്സാഹിപ്പിക്കുന്നതിന് എംഇഎ നിരവധി സംരംഭങ്ങള്‍ സ്വീകരിച്ചിട്ടുണ്ടെന്ന് മുരളീധരന്‍ പറഞ്ഞു. പ്രവാസി ഭാരതീയ ബീമാ യോജന, കുടിയേറ്റ തൊഴിലാളികള്‍ സുരക്ഷിതമായ കുടിയേറ്റം നടത്തുകയും ലക്ഷ്യസ്ഥാന രാജ്യങ്ങളില്‍ മാന്യമായ തൊഴില്‍, ജീവിത സാഹചര്യങ്ങള്‍ ഉറപ്പാക്കുകയും ചെയ്യുന്നതിനുള്ള പ്രീ-ഡിപാര്‍ച്ചര്‍ ഓറിയന്റേഷന്‍ ആന്‍ഡ് ട്രെയിനിംഗ് എന്നിവ അവയില്‍ ഉള്‍പ്പെടുന്നു.
”കൂടാതെ, വിദേശകാര്യ മന്ത്രാലയം 2018ല്‍ ‘സുരക്ഷിത് ജയേന്‍ പ്രശിക്ഷിത് ജയേന്‍’ (സുരക്ഷിതമായി പോകുക, പരിശീലനം നേടുക) എന്ന കാമ്പെയ്ന്‍ ആരംഭിച്ചത് പ്രവാസികള്‍ക്കിടയില്‍ അവബോധം വളര്‍ത്തുന്നതിന് വേണ്ടിയാണെന്നും അദ്ദേഹം പറഞ്ഞു.
ഇന്ത്യയുടെ ജനസംഖ്യാപരമായ ലാഭവിഹിതം പ്രയോജനപ്പെടുത്തുക എന്ന ലക്ഷ്യത്തോടെ ഫ്രാന്‍സ്, യുകെ, ജര്‍മ്മനി, ഓസ്ട്രേലിയ, ഓസ്ട്രിയ, ഇറ്റലി എന്നിവയുമായി ഇന്ത്യ മൈഗ്രേഷന്‍, മൊബിലിറ്റി പങ്കാളിത്ത കരാറുകളില്‍ ഒപ്പുവച്ചതായും അദ്ദേഹം പറഞ്ഞു.
