ലഖ്നൗ: സംസ്ഥാനത്തെ മദ്രസകളുടെ സാമ്പത്തിക സ്രോതസ്സുകളെ കുറിച്ച് അന്വേഷിക്കാൻ ഉത്തർപ്രദേശ് സർക്കാർ മൂന്നംഗ പ്രത്യേക അന്വേഷണ സംഘത്തെ (എസ്ഐടി) രൂപീകരിച്ചു.
കഴിഞ്ഞ രണ്ട് വർഷത്തിനിടെ നിരവധി രാജ്യങ്ങളിൽ നിന്ന് 100 കോടി രൂപ സംഭാവനയായി സ്വീകരിച്ച 80 മദ്രസകൾ ഇതുവരെ കണ്ടെത്തിയിട്ടുണ്ട്.
മദ്രസകൾ ഏത് തലത്തിലാണ് ഈ ഫണ്ട് ചെലവഴിച്ചതെന്നും ക്രമക്കേട് നടന്നിട്ടുണ്ടോ എന്നും കണ്ടെത്താനുള്ള ശ്രമത്തിലാണ് എസ്ഐടിയെന്ന് മുതിർന്ന ഉദ്യോഗസ്ഥർ പറഞ്ഞു.
സംസ്ഥാനത്ത് ഏകദേശം 24,000 മദ്രസകളുണ്ട്, അതിൽ 16,500-ലധികം ഉത്തർപ്രദേശ് ബോർഡ് ഓഫ് മദ്രസ എജ്യുക്കേഷന്റെ അംഗീകാരമുണ്ട്.
“വിദേശ ധനസഹായം വഴി ലഭിച്ച പണം എങ്ങനെ ചെലവഴിച്ചുവെന്ന് ഞങ്ങൾ നോക്കും. മദ്രസകൾ നടത്തുന്നതിനോ മറ്റെന്തെങ്കിലും പ്രവർത്തനങ്ങൾക്കോ പണം ഉപയോഗിക്കുന്നുണ്ടോയെന്ന് പരിശോധിക്കാനാണ് അന്വേഷണം, ”എസ്‌ഐടിയുടെ തലവനായ എടിഎസ് അഡീഷണൽ ഡിജി മോഹിത് അഗർവാൾ പറഞ്ഞു.
അന്വേഷണം പൂർത്തിയാക്കാൻ സംസ്ഥാന സർക്കാർ ഇതുവരെ സമയപരിധി പറഞ്ഞിട്ടില്ലെന്നും അഗർവാൾ പറഞ്ഞു. രജിസ്റ്റർ ചെയ്ത മദ്രസകളുടെ വിശദാംശങ്ങൾ എസ്ഐടി ബോർഡിൽ നിന്ന് ആവശ്യപ്പെട്ടിട്ടുണ്ടെന്ന് വൃത്തങ്ങൾ അറിയിച്ചു.
സംസ്ഥാന മദ്രസ വിദ്യാഭ്യാസ ബോർഡിന്റെ അംഗീകാരമില്ലാത്ത 8,449 മദ്‌റസകൾ പ്രവർത്തിക്കുന്നുണ്ടെന്ന് രണ്ട് മാസത്തെ സർവേയിൽ കണ്ടെത്തി.
