ന്യൂഡല്‍ഹി: ജാര്‍ഖണ്ഡിലെ ചരധര്‍പൂര്‍ ഡിവിഷനു സമീപം പുലര്‍ച്ചെ ഹൗറ-മുംബൈ പാസഞ്ചര്‍ ട്രെയിനിന്റെ 18 കോച്ചുകള്‍ പാളം തെറ്റിയുണ്ടായ അപകടത്തില്‍ രണ്ട് പേര്‍ മരിച്ചു. 20 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. പരിക്കേറ്റ എല്ലാ യാത്രക്കാരെയും ജംഷഡ്പൂരിലെ ടാറ്റ മെയിന്‍ ആശുപത്രിയില്‍ പ്രവേശിപ്പിച്ചു.
പാളം തെറ്റി എത്തിയ ഗുഡ്സ് ട്രെയിന്‍ ഹൗറ-മുംബൈ മെയിലുമായി കൂട്ടിയിടിച്ചതിനെ തുടര്‍ന്നാണ് സംഭവമെന്ന് റെയില്‍വേ അധികൃതര്‍ പറഞ്ഞു.
സംഭവത്തെത്തുടര്‍ന്ന് ഇന്ത്യന്‍ റെയില്‍വേ ഹൗറ-തിതാല്‍ഗഡ്-കാന്തബന്‍ജി എക്‌സ്പ്രസ്, ഖരഗ്പൂര്‍-ജാര്‍ഗ്രാം-ധന്‍ബാദ് എക്‌സ്പ്രസ്, ഹൗറ-ബര്‍ബില്‍-ഹൗറ ജന്‍ ശതാബ്ദി എക്‌സ്പ്രസ്, ടാറ്റാനഗര്‍-ഇത്വാരി എക്‌സ്പ്രസ്, എല്‍ടിടി-എക്‌സ്പ്രസ് തുടങ്ങി അഞ്ച് ട്രെയിനുകള്‍ റദ്ദാക്കി.
നേരത്തെ ജൂലൈ 18 ന് ഉത്തര്‍പ്രദേശിലെ ഗോണ്ടയില്‍ ദിബ്രുഗഡ് എക്സ്പ്രസിന്റെ നിരവധി ബോഗികള്‍ പാളം തെറ്റിയതിനെ തുടര്‍ന്ന് നാല് പേര്‍ മരിക്കുകയും 20 ഓളം പേര്‍ക്ക് പരിക്കേല്‍ക്കുകയും ചെയ്തിരുന്നു.
