ന്യൂഡൽഹി: നരേന്ദ്ര മോദിയുടെ നേതൃത്വത്തിലുള്ള മൂന്നാം എൻഡിഎ സർക്കാർ ഇന്ന് സത്യപ്രതിജ്ഞ ചെയ്ത് അധികാരമേൽക്കും. വൈകുന്നേരം 7.15ന് രാഷ്ട്രപതി ഭവനിൽ വച്ച് നടക്കുന്ന ചടങ്ങിൽ പ്രധാനമന്ത്രിക്കൊപ്പം 30 മന്ത്രിമാർ കൂടി സത്യപ്രതിജ്ഞ ചെയ്ത് അധികാരമേൽക്കും. പുതിയ സർക്കാരിലെ മുഴുവൻ മന്ത്രിമാരുടെയും അംഗബലം 78 നും 81 നും ഇടയിലായിരിക്കുമെന്നാണ് പ്രതീക്ഷിക്കുന്നത്.
പ്രധാനമന്ത്രി മോദിക്ക് ശേഷം സത്യപ്രതിജ്ഞ ചെയ്യുന്നത്, ആഭ്യന്തരം, പ്രതിരോധം, ധനം, വിദേശകാര്യം എന്നിവയുടെ നിർണായക വകുപ്പുകൾ വഹിക്കുന്നവർ ഉൾപ്പെടെ സർക്കാരിൻ്റെ ഉന്നത മന്ത്രിമാരായിരിക്കും. ഈ വകുപ്പുകളെല്ലാം ബിജെപിയുടെ കൈവശം തുടരും. സ്റ്റീൽ, സിവിൽ ഏവിയേഷൻ, കൽക്കരി തുടങ്ങിയ നിർണായക ഇൻഫ്രാസ്ട്രക്ചർ മന്ത്രാലയങ്ങളുടെ ചുമതല വഹിക്കേണ്ട മന്ത്രിമാരും സത്യപ്രതിജ്ഞ ചെയ്തേക്കുമെന്നാണ് വിവരം. സത്യപ്രതിജ്ഞാ ചടങ്ങിൻ്റെ ഔദ്യോഗിക സമയം വൈകുന്നേരം 7.15 മുതൽ 8 വരെയാണ്.
10 വർഷത്തിനിടെ ഇതാദ്യമായാണ് ബിജെപിക്ക് ഒറ്റയ്ക്ക് ഭൂരിപക്ഷം കുറയുന്നത്. ഇത് സത്യപ്രതിജ്ഞാ ചടങ്ങിലും മന്ത്രിസഭാ ഘടനയിലും പ്രതിഫലിക്കും. സഖ്യകക്ഷികൾ, പ്രത്യേകിച്ച് ചന്ദ്രബാബു നായിഡുവിൻ്റെ തെലുങ്കുദേശം പാർട്ടിയും നിതീഷ് കുമാറിൻ്റെ ജനതാദൾ യുണൈറ്റഡും ഒന്നിലധികം മന്ത്രിസ്ഥാനങ്ങൾക്കായി സമ്മർദം ചെലുത്തുന്നുണ്ട്. ടിഡിപിയിൽ നിന്ന് 4 മന്ത്രിമാരും ജെഡിയുവിന്റെ രണ്ട് മന്ത്രിമാരും ഉണ്ടാകുമെന്നാണ് സൂചന. മറ്റ് പാർട്ടികളെയും ഉൾക്കൊള്ളേണ്ടതുണ്ട്.
ബിജെപിയും പ്രധാനമന്ത്രിയും മന്ത്രിമാരുടെ എണ്ണം കുറയ്ക്കാൻ പദ്ധതിയിട്ടിരുന്നെങ്കിലും, പ്രധാനമന്ത്രി മോദിയുടെ നേതൃത്വത്തിലുള്ള മന്ത്രിസഭയുടെ മൂന്നാമൂഴത്തിൽ, ക്യാബിനറ്റിലെ വളരെ കുറച്ച് അംഗങ്ങൾ ഒന്നിൽ കൂടുതൽ പോർട്ട്‌ഫോളിയോ വഹിക്കുമെന്ന് വൃത്തങ്ങൾ അറിയിച്ചു.
ശ്രീലങ്കൻ പ്രസിഡൻ്റ് റനിൽ വിക്രമസിംഗെ, മാലിദ്വീപ് പ്രസിഡൻ്റ് മുഹമ്മദ് മുയിസു, ബംഗ്ലാദേശ് പ്രധാനമന്ത്രി ഷെയ്ഖ് ഹസീന, മൗറീഷ്യസ് പ്രധാനമന്ത്രി പ്രവിന്ദ് കുമാർ ജുഗ്നൗത്ത്, നേപ്പാൾ പ്രധാനമന്ത്രി പുഷ്പ കമാൽ ദഹൽ ‘പ്രചണ്ഡ’, ഭൂട്ടാൻ പ്രധാനമന്ത്രി ഷെറിംഗ് ടോബ്ഗേ, സീഷെൽസ് വൈസ് പ്രസിഡൻ്റ് അഹമ്മദ് അഫീഫ് എന്നിവരുൾപ്പെടെ നിരവധി വിദേശ നേതാക്കൾ ചടങ്ങിൽ പങ്കെടുക്കും.
