വാഷിംഗ്ടണ്‍: ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിന്റെ 45-ാം വാര്‍ഷികത്തില്‍ ചൈനയുടെ പ്രസിഡന്റ് ഷി ജിന്‍പിംഗ് യുഎസ് പ്രസിഡന്റ് ജോ ബൈഡനുമായി ആശംസകള്‍ കൈമാറിയെന്ന് ചൈനീസ് വിദേശകാര്യ മന്ത്രാലയം തിങ്കളാഴ്ച അറിയിച്ചു.
ഇരു രാജ്യങ്ങളും കൊടുങ്കാറ്റുകളെ അതിജീവിച്ച് പൊതുവെ മുന്നോട്ട് നീങ്ങിയിട്ടുണ്ടെന്നും ഇത് അവരുടെ ജനങ്ങളുടെ ക്ഷേമം വര്‍ധിപ്പിക്കുകയും ലോക സമാധാനത്തിനും സുസ്ഥിരതയ്ക്കും സമൃദ്ധിക്കും സംഭാവന നല്‍കുകയും ചെയ്തുവെന്ന് ഷി തന്റെ സന്ദേശത്തില്‍ പറഞ്ഞു.
ചൈനയും യുഎസും തമ്മിലുള്ള ബന്ധം ഉഭയകക്ഷി ബന്ധങ്ങളുടെയും അന്താരാഷ്ട്ര ബന്ധങ്ങളുടെയും ചരിത്രത്തിലെ ഒരു പ്രധാന സംഭവമാണെന്ന് ഷി വിശേഷിപ്പിച്ചു.
ലോകത്തിലെ ഏറ്റവും വലിയ രണ്ട് സമ്പദ്വ്യവസ്ഥകളായ ചൈന-യു.എസ്. ബന്ധം തണുത്തുറഞ്ഞിരുന്നു, എന്നാല്‍ നവംബറില്‍ സാന്‍ഫ്രാന്‍സിസ്‌കോയില്‍ ഷിയും ബൈഡനും തമ്മിലുള്ള ഉയര്‍ന്ന തലത്തിലുള്ള ഉച്ചകോടിക്ക് മുമ്പായി ആശയവിനിമയവും വിശ്വാസവും പുനര്‍നിര്‍മ്മിക്കുന്നതിനായി ബൈഡന്‍ അഡ്മിനിസ്‌ട്രേഷന്‍ ഉദ്യോഗസ്ഥര്‍ ബീജിംഗ് സന്ദര്‍ശിക്കുകയും കൂടിക്കാഴ്ച നടത്തുകയും ചെയ്തിരുന്നു.
ഭാവിയെ അടിസ്ഥാനമാക്കിയുള്ള കാഴ്ചപ്പാടിന് കീഴിലുള്ള ഇരു രാജ്യങ്ങളുടെയും ബന്ധത്തിന്റെ ദിശയാണ് ഉച്ചകോടി ചൂണ്ടിക്കാണിച്ചതെന്ന് ഷി പറഞ്ഞു.
‘ചൈനയുടെയും അമേരിക്കയുടേയും ജനങ്ങളുടെ പ്രയോജനത്തിനായി ചൈന-യുഎസ് ബന്ധം നയിക്കുന്നതിനും ലോക സമാധാനത്തിന്റെയും വികസനത്തിന്റെയും ലക്ഷ്യം പ്രോത്സാഹിപ്പിക്കുന്നതിനും പ്രസിഡന്റ് ബൈഡനുമായി പ്രവര്‍ത്തിക്കാന്‍ ഞാന്‍ തയ്യാറാണ്,” ഷി പറഞ്ഞു.
മുന്‍ പ്രസിഡന്റും ചൈനയുടെ തുറന്ന വിമര്‍ശകനുമായ ഡൊണാള്‍ഡ് ട്രംപ് രണ്ടാം തവണയും ബൈഡനെതിരെ തിരഞ്ഞെടുപ്പിലേക്ക് തിരിച്ചുവരാനും നവംബറില്‍ യുഎസില്‍ പ്രസിഡന്റ് തിരഞ്ഞെടുപ്പ് നടക്കാനിരിക്കുന്ന വേളയിലുമാണ് നിര്‍ണ്ണായക നീക്കം.
അതേസമയം, ഉത്തരകൊറിയന്‍ നേതാവ് കിം ജോങ് ഉന്നുമായി ഷി പുതുവത്സര സന്ദേശങ്ങള്‍ കൈമാറി, ഇരുവരും 2024 ഇരു രാജ്യങ്ങള്‍ക്കും ‘സൗഹൃദ വര്‍ഷമായി’ പ്രഖ്യാപിക്കുകയും അതിനായി നിരവധി പ്രവര്‍ത്തനങ്ങള്‍ ആരംഭിക്കുകയും ചെയ്തുവെന്ന് ചൈനീസ് വിദേശകാര്യ മന്ത്രാലയം പറഞ്ഞു.
തന്ത്രപരമായ പരസ്പര വിശ്വാസം വര്‍ധിപ്പിക്കുന്നതിനും വിനിമയവും സഹകരണവും വര്‍ധിപ്പിക്കുന്നതിനും കൂടുതല്‍ ഉഭയകക്ഷി ബന്ധങ്ങള്‍ പ്രോത്സാഹിപ്പിക്കുന്നതിനും മേഖലയിലെ സമാധാനവും സുസ്ഥിരതയും നിലനിര്‍ത്തുന്നതിന് പുതിയ സംഭാവനകള്‍ നല്‍കാനും ഉത്തരകൊറിയയുമായി ചേര്‍ന്ന് പ്രവര്‍ത്തിക്കാന്‍ ചൈന തയ്യാറാണെന്നും ഷി പറഞ്ഞു.
