പത്തനംതിട്ട: നടന്‍ ദിലീപ് ശബരിമലയില്‍ ദര്‍ശനം നടത്തി. വ്യാഴാഴ്ച നടയടക്കുന്നതിന് തൊട്ടുമുന്‍പാണ് ദിലീപ് ദര്‍ശനം നടത്തിയത്. ഹരിവരാസനം കീര്‍ത്തനം പൂര്‍ത്തിയായി നടയടച്ച ശേഷമാണ് ദിലീപ് ദര്‍ശനം പൂര്‍ത്തിയാക്കി മടങ്ങിയത്.
അതേസമയം, സന്നിധാനത്ത് വന്‍ ഭക്തജന തിരക്ക് തുടരുകയാണ്. വ്യാഴാഴ്ച രാത്രി 9 മണി വരെ 74,974 പേര്‍ ദര്‍ശനം നടത്തിയെന്നാണ് കണക്ക്. അതില്‍ 13,790 പേര്‍ സ്‌പോട്ട് ബുക്കിങ് വഴി എത്തിയവരാണ്. അത്താഴ പൂജ കഴിഞ്ഞപ്പോള്‍ പതിനെട്ടാം പടി കയറാനുള്ള നിര വലിയ നടപ്പന്തലും പിന്നിട്ട് ശരം കുത്തി ഭാഗത്തേക്ക് നീണ്ടു. രാത്രി 11 ന് ഹരിവരാസനം പാടി നട അടയ്ക്കും മുന്‍പ് ഇതില്‍ പകുതി പേര്‍ക്കു പോലും ദര്‍ശനം കിട്ടിയിരുന്നില്ല.
