ന്യൂഡൽഹി: നാലാമത് ക്വാഡ് ഉച്ചകോടി അമേരിക്കയിലെ ഡെലവെയറിൽ സെപ്റ്റംബർ 21-ന് നടക്കും. പ്രധാനമന്ത്രി നരേന്ദ്രമോദി, അമേരിക്കൻ പ്രസിഡന്റ് ജോ ബൈഡൻ, ഓസ്‌ട്രേലിയൻ പ്രധാനമന്ത്രി ആന്റണി അൽബനീസ്, ജപ്പാൻ പ്രധാനമന്ത്രി ഫുമിയോ കിഷിദ എന്നിവർ പങ്കെടുക്കും.
യുഎൻ പൊതുസഭയെ സെപ്‌തംബർ 28ന് വിദേശകാര്യമന്ത്രി എസ്. ജയശങ്കർ അഭിസംബോധന ചെയ്യും. യുഎസ് സന്ദർശത്തിനിടെ മോദി പ്രസംഗിക്കുമെന്നായിരുന്നു ആദ്യ റിപ്പോർട്ട്.
ഇന്ത്യ, അമേരിക്ക, ഓസ്‌ട്രേലിയ, ജപ്പാൻ എന്നീ രാജ്യങ്ങളുടെ കൂട്ടായ്മയാണ് ക്വാഡ് അഥവാ ക്വാഡ്രിലാറ്ററൽ സെക്യൂരിറ്റി ഡയലോഗ്. ഇന്ത്യ-പസഫിക് മേഖലയുമായി ബന്ധപ്പെട്ട വിഷയങ്ങൾ, രാജ്യങ്ങൾക്കിടയിലെ നയതന്ത്രബന്ധം ശക്തിപ്പെടുത്തൽ, ആരോഗ്യസുരക്ഷ, കാലാവസ്ഥാ വ്യതിയാനം തുടങ്ങിയ വിഷയങ്ങൾ യോഗത്തിൽ ചർച്ചയാകും.
ഭരണകാലാവധി അവസാനിക്കുന്ന കിഷിദയുടെയും ജോ ബൈഡന്റെയും അവസാന ക്വാഡ് ഉച്ചകോടിയാണിത്. അതിനാൽ ബൈഡന്റെ ജന്മനാട് ഉച്ചകോടിക്ക് വേദിയാക്കിയെന്നാണ് സൂചന. അടുത്തവർഷം ഇന്ത്യയിലായിരിക്കും ഉച്ചകോടി നടക്കുക.
