കൊച്ചി: പ്രവാസ ലോകം കണ്ട ഏറ്റവും വലിയ ദുരന്തമാണ് കുവൈറ്റില്‍ ഉണ്ടായതെന്ന് മുഖ്യമന്ത്രി പിണറായി വിജയന്‍ നെടുമ്പാശ്ശേരിയില്‍ പറഞ്ഞു. കുവൈത്തില്‍ മരിച്ച മലയാളികളുള്‍പ്പടെയുള്ളവരുടെ മൃതദേഹങ്ങള്‍ ഏറ്റുവാങ്ങാന്‍ വിമാനത്താവളത്തിലെത്തിയപ്പോഴായിരുന്നു അദ്ദേഹത്തിന്റെ പ്രതികരണം.
കേരളത്തിന്റെ ജീവനാഡിയാണ് പ്രവാസികള്‍. ജീവിതത്തില്‍ നിരവധി ബുദ്ധിമുട്ടുകള്‍ അനുഭവിക്കുന്നവരാണവര്‍. പ്രവാസികളുടെ തിരിച്ചുവരവ് കാത്തിരിക്കുന്ന ഉറ്റവര്‍ക്ക് താങ്ങാവുന്നതിലും അധികമാണ് ഈ ദുരിതം. പ്രവാസ ലോകം കണ്ട വലിയ ദുരന്തമാണിതെന്നും മുഖ്യമന്ത്രി ദുഖം പങ്കുവെച്ചു.
ഇങ്ങനെ ഒരു ദുരന്തം ഇനി ആവര്‍ത്തിക്കാതിരിക്കാനുള്ള മുന്‍കരുതലുകള്‍ അത്യാവശ്യമാണെന്നും അത് കുവൈത്ത് സര്‍ക്കാരും ശ്രദ്ധിക്കുമെന്നാണ് വിശ്വാസമെന്നും മുഖ്യമന്ത്രി പറഞ്ഞു. മാത്രമല്ല, മരിച്ചവരുടെ കുടുംബങ്ങള്‍ക്ക് മതിയായ നഷ്ടപരിഹാരം കുവൈത്ത് സര്‍ക്കാര്‍ നല്‍കുമെന്ന പ്രതീക്ഷയും അദ്ദേഹം പങ്കുവെച്ചു.
അതേസമയം, മന്ത്രി വീണാ ജോര്‍ജ്ജിന് കുവൈത്തിലേക്കുള്ള യാത്രാ അനുമതി നിഷേധിച്ച സംഭവത്തില്‍ വിവാദങ്ങള്‍ക്ക് ഇപ്പോള്‍ സമയമില്ലെന്നും മുഖ്യമന്ത്രി പറഞ്ഞു.
കുവൈത്ത് ദുരന്തത്തില്‍ മരിച്ചവരുടെ കാര്യത്തില്‍ കേന്ദ്ര സര്‍ക്കാരും കുവൈത്ത് സര്‍ക്കാരും ഫലപ്രദമായി ഇടപെടല്‍ നടത്തിയെന്നും മുഖ്യമന്ത്രി വ്യക്തമാക്കി.
