ലണ്ടന്‍: ബ്രിട്ടീഷ് എഴുത്തുകാരി സാമന്ത ഹാര്‍വി 2024 ലെ ബുക്കര്‍ പ്രൈസ് നേടി. ഓര്‍ബിറ്റല്‍ എന്ന നോവലിലാണ് പുരസ്കാരം തേടിയെത്തിയത്. അന്താരാഷ്ട്ര ബഹിരാകാശ നിലയത്തില്‍ ആറ് ബഹിരാകാശ സഞ്ചാരികള്‍ ഭൂമിയെ 24 മണിക്കൂര്‍ വലംവയ്ക്കുന്ന കഥ പറയുന്ന സയമന്‍സ് ഫിക്ഷന്‍ നോവലാണിത്.
64,000 ഡോളറാണ് (50000 പൗണ്ട്) പുരസ്‌കാരത്തുകയായി ലഭിക്കുക. അമേരിക്ക, റഷ്യ, ഇറ്റലി, ബ്രിട്ടന്‍, ജപ്പാന്‍ എന്നിവിടങ്ങളില്‍നിന്നുള്ള ബഹിരാകാശ യാത്രികര്‍ 24 മണിക്കൂറില്‍ 16 സൂര്യോദയങ്ങളും അസ്തമയങ്ങളും കാണുന്നതും ഭൂമിയെ നിരീക്ഷിക്കുന്നതുമായി ബന്ധപ്പെട്ടാണ് കഥ മുന്നോട്ടുപോകുന്നത്. ലോക്ക്ഡൗണ്‍ സമയത്താണ് സാമന്ത ഈ നോവല്‍ എഴുതാനാരംഭിച്ചത്.
ആന്‍ മൈക്കല്‍സ് എഴുതിയ ഹെല്‍ഡ്, റേച്ചല്‍ കുഷ്‌നറുടെ ക്രിയേഷന്‍ ലെയ്ക്ക്, യേല്‍ വാന്‍ ഡെല്‍ വൂഡന്റെ ദ സെയ്ഫ്കീപ്പ്, ഷാര്‍ലറ്റ് വുഡിന്റെ യാര്‍ഡ് ഡിവോഷണല്‍, പേഴ്‌സിവല്‍ എവെറെറ്റ് എഴുതിയ ജെയിംസ് എന്നിവയെ പിന്തള്ളിയാണ് ഓര്‍ബിറ്റല്‍ പുരസ്കാരം സ്വന്തമാക്കിയത്.
