മലപ്പുറം: മലപ്പുറത്ത് സ്‌കൂള്‍ വിദ്യാര്‍ത്ഥികള്‍ക്കിടയിലേക്ക് കാര്‍ ഇടിച്ചുകയറി അപകടം. പരീക്ഷ കഴിഞ്ഞ് നടന്ന് പോകുകയായിരുന്ന മൂന്ന സ്‌കൂള്‍ വിദ്യാര്‍ത്ഥികളാണ് അപകടത്തിനിരയായത്. ഇവരുടെ പരിക്ക് ഗുരുതരമല്ല. ഇന്ന് ഉച്ചയ്ക്ക് 12.30ഓടെയാണ് അപകടമുണ്ടായത്.
അപകടത്തില്‍ മലപ്പുറം പൊന്നാനി എവി ഹൈസ്‌കൂളിലെ മൂന്ന് വിദ്യാര്‍ത്ഥികള്‍ക്കാണ് പരിക്കേറ്റത്. സ്‌കൂളിന് സമീപത്തുവെച്ചാണ് അപകടമുണ്ടായത്. വിദ്യാര്‍ത്ഥികളെ ഇടിച്ച കാര്‍ മറ്റൊരു കാറിലും ഇടിച്ചു.
ഇന്നലെ പാലക്കാട് ലോറി പാഞ്ഞുകയറി നാല് സ്‌കൂള്‍ വിദ്യാര്‍ത്ഥികള്‍ മരിച്ച ദാരുണ അപകടത്തിന്റെ ഞെട്ടല്‍ മാറും മുമ്പാണ് പൊന്നാനയിലെ അപകടം. കാറിന് അധികം വേഗത്തിലല്ലാത്തതിനാലാണ് വലിയ അപകടം ഒഴിവായതെന്ന് നാട്ടുകാര്‍ പറഞ്ഞു. പരിക്കേറ്റ കുട്ടികളില്‍ രണ്ടുപേര്‍ താലൂക്ക് ആശുപത്രിയിലും ഒരാള്‍ സ്വകാര്യ ആശുപത്രിയിലും ചികിത്സയിലാണ്.
