എന്‍.ആര്‍.ഐ റിപ്പോര്‍ട്ടര്‍ ടീം
ചിക്കാഗോ: ചിക്കാഗോ സോഷ്യല്‍ ക്ളബിന്റെ ആഭിമുഖ്യത്തിൽ സെപ്റ്റംബർ 2 ന് നടത്തുന്ന പത്താമത് അന്താരാഷ്ട്ര വടംവലി മത്സരത്തിന് ചിക്കാഗോ ഒരുങ്ങി. നോർത്ത് അമേരിക്കയിൽ നടക്കുന്ന, ഏറ്റവും കൂടുതൽ പ്രൈസ് മണി നൽകുന്ന വടംവലി മൽസരത്തിലേക്ക് എല്ലാ മലയാളികളേയും സ്വാഗതം ചെയ്യുന്നതായും എല്ലാ മലയാളികൾക്കുമുള്ള ഓണ സമ്മാനമാണ് ഈ മൽസരമെന്നും ചിക്കാഗോ സോഷ്യൽ ക്ലബ് പ്രസിഡന്റ്-സിബി കദളിമറ്റം, സെക്രട്ടറി – സിബി കൈതക്കത്തൊട്ടിയിൽ, ട്രഷറർ ജോമോൻ തൊടുകയിൽ എന്നിവർ പത്ര സമ്മേളനത്തിൽ അറിയിച്ചു. പ്രശസ്ത നടനും കേന്ദ്ര മന്ത്രിയുമായ സുരേഷ് ഗോപി മുഖ്യാതിഥി ആയിരിക്കും.വിവിധ രാജ്യങ്ങളിൽ നിന്നുള്ള 18 ടീമുകൾ വടംവലി മത്സരത്തിൽ പങ്കെടുക്കുമെന്നും എല്ലാ ഒരുക്കങ്ങളും പൂർത്തിയായതായും ടുർണമെന്റ് കമ്മറ്റി ചെയർമാൻ സിറിയക് കൂവക്കാട്ടിൽ , ജനറൽ കൺവീനർ സ്റ്റീഫൻ കിഴക്കേക്കുറ്റ്‌ എന്നിവർ പറഞ്ഞു. ആദ്യമായി വനിതകളുടെ വടംവലി മൽസരവും ഇത്തവണ നടക്കുന്നു എന്ന പ്രത്യേകതയും ഉണ്ട്.
പത്ര സമ്മേളനത്തിൽ , വൈസ് പ്രസിഡൻറ് ജെസ്‌മോൻ പുറമഠം, ജോയിൻറ് സെക്രട്ടറി സാബു പടിഞ്ഞാറേൽ , ഫിനാൻസ് കമ്മിറ്റി ചെയർമാൻ മാനി കരികുളം , പി.ആർ.ഒ മാത്യു തട്ടാമറ്റം, ഫുഡ് ഫെസ്റ്റിവൽ കമ്മിറ്റി ചെയർമാൻ ജോസ് മണക്കാട്ട് എന്നിവരും സന്നിഹിതരായിരുന്നു.
രണ്ട് ദിവസം നീണ്ടു നിൽക്കുന്ന ആഘോഷ-മത്സര പരിപാടികളുടെ ഭാഗമായി സെപ്റ്റംബർ 1 ഞായർ 5 മണിക്ക് ബെൽവുഡ് മാർ തോമാശ്ലീഹ കത്തീഡ്രൽ പള്ളി പാരിഷ് ഹാൾ അങ്കണത്തിൽ സോഷ്യൽ മേള – 2024 സംഘടിപ്പിക്കും. (Address: 5000 St Charles Rd, Bellwood, IL 60104) സോഷ്യൽ മേളയുടെ ഭാഗമായി വൈവിധ്യമാർന്ന ഭക്ഷണ വിഭവങ്ങൾ ഒരുക്കികൊണ്ട് ഫുഡ് ഫെസ്റ്റിവലും ഗോൾഡ് റഷ് ഗെയിമിങ് സ്പോൺസർ ചെയ്യുന്ന രമേഷ് പിഷാരടിയും മഞ്ജരിയും നയിക്കുന്ന സ്‌റ്റേജ് ഷോയും അരങ്ങേറും. പ്രവേശനം സൗജന്യമായിരിക്കും.
സെപ്റ്റംബർ 2 തിങ്കളാഴ്ച്ച ചിക്കാഗോ സെന്റ് മേരീസ് ക്‌നാനായ പള്ളി അങ്കണത്തിൽ (Address: 7800 Lyons St, Morton Grove, IL 60053) നടക്കുന്ന വടംവലി മത്സരം ഏറ്റവും മികച്ചതായിരിക്കുമെന്നും വൻ സർപ്രൈസുകൾ കാത്തിരിക്കുന്നുണ്ടെന്നും സംഘാടക സമിതി അറിയിച്ചു.
11111 ഡോളറാണ് വടംവലി മത്സരത്തില്‍ ഒന്നാം സ്ഥാനക്കാർക്കുള്ള സമ്മാനത്തുക. ഒന്നാം സമ്മാന ജേതാക്കള്‍ക്കുള്ള മാണി നെടിയകാലയില്‍ മെമ്മോറിയല്‍ എവര്‍റോളിംഗ് ട്രോഫിയും 11111 ഡോളറും സ്പോണ്‍സര്‍ ചെയ്യുന്നത് ജോയ് നെടിയകാലയിലാണ്. രണ്ടാം സ്ഥാനം നേടുന്ന ടീമിനുള്ള 5555 സമ്മാനത്തുകയും ജോയ് മുണ്ടപ്ളാക്കല്‍ മെമ്മോറിയല്‍ എവര്‍റോളിംഗ് ട്രോഫിയും സ്പോണ്‍സര്‍ ചെയ്യുന്നത് ഫിലിപ്പ് മുണ്ടപ്ളാക്കലാണ്. മൂന്നാം സ്ഥാനത്തിനുള്ള 3333 ഡോളർ സമ്മാനത്തുകയും ചാക്കോ കിഴക്കേക്കൂറ്റ് മെമ്മോറിയല്‍ എവര്‍റോളിംഗ് ട്രോഫിയും സ്പോണ്‍സര്‍ ചെയ്യുന്നത് എലൈറ്റ് ഗെയ്മിങ്ങാണ്. നാലാം സമ്മാന ജേതാക്കള്‍ക്കുള്ള ക്യാഷ് പ്രൈസ് 1111 ഡോളറാണ്. മാംഗല്യ ജ്വല്ലറിയാണ് നാലാം സമ്മാനം സ്പോണ്‍സര്‍ ചെയ്യുന്നത് .
ഹ്യൂസ്റ്റൺ ബ്രദേഴ്‌സ് , ഹ്യൂസ്റ്റൺ ഗരുഡൻസ് , ഹ്യൂസ്റ്റൻസ് കൊമ്പൻസ് , ഡാളസ് ആഹാ, ഡാളസ് കൊമ്പൻസ്, ടൊറന്റോ ടീം ഗരുഡൻസ്, കെ.ബി.സി കാനഡ, കാനഡ ടീം ഗ്ലാഡിയേറ്റേഴ്‌സ് , ലണ്ടൻ ഗ്ലാഡിയേറ്റേഴ്‌സ് . ഹോക്സ് കാനഡ, ടാമ്പാ ടസ്‌കേഴ്‌സ് , അരീക്കര അച്ചായൻസ് , അരീക്കര അച്ചായൻസ് ബി ടീം, ന്യൂയോർക്ക് കിങ്‌സ് , കുവൈറ്റ് സെവൻസ്, ഐർലൻഡ് ആഹാ സെവൻസ്, തൊടുകൻസ് യു.കെ , ഹ്യൂസ്റ്റൺ റോയൽസ് എന്നീ ടീമുകളാണ് ആവേശകരമായ മത്സരത്തിൽ അണിചേരുക.
Chicago social Club tug of war tournament on September 2
