മാത്യുക്കുട്ടി ഈശോ
ന്യൂയോര്‍ക്ക്: കഴിഞ്ഞ ഒരു ദശാബ്ദക്കാലമായി ന്യൂയോര്‍ക്ക് ലോങ്ങ് ഐലന്‍ഡ് ആസ്ഥാനമായി പ്രവര്‍ത്തിക്കുന്ന പ്രമുഖ ചാരിറ്റി സംഘടന ECHO (Enhance Community through Harmonious Outreach) പത്താമത് വാര്‍ഷിക ഡിന്നര്‍ മീറ്റിങ്ങും മൂന്നാമത് ഹ്യുമാനിറ്റേറിയന്‍ അവാര്‍ഡ് ദാനവും അതി വിപുലമായി ജനുവരി 7 ഞായറാഴ്ച വൈകിട്ട് 5 മുതല്‍ ജെറിക്കോയിലുള്ള കൊട്ടിലിയന്‍ റെസ്റ്റോറന്റില്‍ വച്ച് (The Cottillion Restaurant, 440 Jericho Turnpike, Jericho, NY 11753) നടത്തുന്നു.
ന്യൂയോര്‍ക്കിലെ രാഷ്ട്രീയ-സാമൂഹിക-സാംസ്‌കാരിക മേഖലകളിലെ പ്രമുഖരുടെ മഹനീയ സാന്നിധ്യത്തില്‍ പ്രസ്തുത യോഗത്തില്‍ ഈ വര്‍ഷത്തെ എക്കോ ഹ്യുമാനിറ്റേറിയന്‍ അവാര്‍ഡ് ജേതാവ് ജോണ്‍സണ്‍ സാമുവേലിനെ അവാര്‍ഡ് നല്‍കി ആദരിക്കുന്നു. ജീവകാരുണ്യ പ്രവര്‍ത്തനത്തില്‍ സ്വയം സമര്‍പ്പിതമായി ആതുര സേവനം ചെയ്യുന്ന ഇന്ത്യന്‍ വംശജരായ അമേരിക്കന്‍ നിവാസികളില്‍ നിന്നും അപേക്ഷകള്‍ സ്വീകരിച്ച് അവ വിശകലനം ചെയ്താണ് അവാര്‍ഡ് കമ്മറ്റി ജേതാവിനെ തെരഞ്ഞെടുത്തത്.
അമേരിക്കയിലെ വിവിധ സംസ്ഥാനങ്ങളില്‍ നിന്നും നിശ്ചിത തീയതിക്കുള്ളില്‍ ലഭിച്ച അനേകം അപേക്ഷകരില്‍ നിന്നുമാണ് വേറിട്ട ആതുര സേവനം ചെയ്യുന്ന മനുഷ്യസ്‌നേഹിയായ ജോണ്‍സണ്‍ സാമുവേലിനെ കമ്മറ്റി തെരഞ്ഞെടുത്തത്. വിധിയുടെ ക്രൂരതയാലും വിവിധ ശാരീരിക പ്രശ്‌നങ്ങളാലും കാലുകള്‍ നഷ്ടപ്പെട്ട് ചലനശേഷി ഇല്ലാതിരുന്ന 204 പേര്‍ക്കാണ് കഴിഞ്ഞ പത്തു വര്‍ഷത്തിനിടെ ജോണ്‍സണ്‍ സാമുവേല്‍ എന്ന മനുഷ്യ സ്‌നേഹിയുടെ നിസ്വാര്‍ഥ പ്രവര്‍ത്തനത്തിലൂടെ ചലന ശേഷി ലഭിച്ചത്.
മാവേലിക്കര വെട്ടിയാറില്‍ ജനിച്ചുവളര്‍ന്ന് പതിനേഴാമത്തെ വയസ്സില്‍ മാതാപിതാക്കളോടൊപ്പം അമേരിക്കയിലേക്ക് കുടിയേറിയ ജോണ്‍സണ്‍ ലോങ്ങ് ഐലന്‍ഡിലുള്ള മിനിയോള ഹൈസ്‌കൂളില്‍ നിന്നും ഹൈസ്‌കൂള്‍ വിദ്യാഭ്യാസം പൂര്‍ത്തീകരിച്ചു. പിന്നീട് ക്യുന്‍സ് കോളേജില്‍ നിന്നും കമ്പ്യൂട്ടര്‍ സയന്‍സില്‍ ഗ്രാജുവേഷനും കരസ്ഥമാക്കി. കഴിഞ്ഞ 22 വര്‍ഷമായി മോണ്‍റ്റിഫയര്‍ മെഡിക്കല്‍ സെന്ററില്‍ ഐ.ടി. ഉദ്യോഗസ്ഥനായി. ഇപ്പോള്‍ ഐ.ടി. ഡിപ്പാര്‍ട്‌മെന്റിലെ സീനിയര്‍ മാനേജര്‍ ആയി ജോലി ചെയ്യുന്നു.
തന്റെ ജോലിയില്‍ നിന്നുമുള്ള വരുമാനത്തില്‍ നിന്നും ഒരു പങ്ക് ജീവകാരുണ്യ പ്രവര്‍ത്തനത്തിനായി മാറ്റി വച്ചാണ് കാലുകള്‍ നഷ്ടപ്പെട്ട നിര്‍ധനര്‍ക്ക് കൃത്രിമ കാലുകള്‍ നല്‍കുന്ന പുണ്യ പ്രവര്‍ത്തിയില്‍ ഏര്‍പ്പെട്ടിരിക്കുന്നത്. 2018 മുതല്‍ പ്രസ്തുത നന്മ പ്രവര്‍ത്തിയില്‍ താല്പര്യമുള്ളവരില്‍ നിന്നും ജോണ്‍സന്റെ ഉടമസ്ഥതയിലുള്ള ലൈഫ് & ലിംബ് ചാരിറ്റബിള്‍ ട്രസ്റ്റിലൂടെ സംഭാവന സ്വീകരിച്ചുകൊണ്ട് കൃത്രിമ കാല്‍ വിതരണം കൂടുതല്‍ ആളുകളിലേക്ക് വിപുലീകരിച്ചു.
എക്കോ 2021-ല്‍ ആരംഭിച്ച ഹ്യുമാനിറ്റേറിയന്‍ അവാര്‍ഡിന്റെ ആദ്യ ജേതാവായി ന്യൂഹൈഡ് പാര്‍ക്കില്‍ താമസിക്കുന്ന ജോണ്‍ മാത്യുവും 2022-ലെ രണ്ടാമത് അവാര്‍ഡ് ജേതാവായി റോക്ക്ലാന്‍ഡ് കൗണ്ടിയില്‍ റിയല്‍ എസ്റ്റേറ്റ് ബിസിനെസ്സ് നടത്തുന്ന ജോര്‍ജ് ജോണ്‍ കല്ലൂരും അര്‍ഹരായിരുന്നു. 2,500 ഡോളറും പ്രശംസാ ഫലകവുമാണ് സമ്മാനമായി നല്‍കുന്നത്.
ECHO നിലവില്‍ നടത്തിവരുന്ന മുഖ്യമായ കാരുണ്യ പ്രവര്‍ത്തനങ്ങളാണ് സീനിയര്‍ വെല്‍നെസ്സ് പ്രോഗ്രാം, ഹംഗര്‍ ഹണ്ട് പ്രോഗ്രാം, ഭവന രഹിതര്‍ക്കുള്ള ഭവന നിമ്മാണ പ്രോഗ്രാം, സ്‌കൂള്‍ കുട്ടികളില്‍ സേവന മനസ്ഥിതി വളര്‍ത്തുന്നതിനുള്ള മദര്‍ തെരേസാ സേവനാ അവാര്‍ഡ് എന്നിവ. (Senior Wellness Program, Hunger Hunt Program, Home for Homeless Program and Mother Teressa Service Award).
നമ്മുടെ സമൂഹത്തിലെ അറുപതു വയസ്സിനു മേല്‍ പ്രായമുള്ള മുതിര്‍ന്ന വ്ക്തികള്‍ക്ക് വാര്‍ധക്യ സമയത്തുള്ള ഏകാന്തതയും മാനസിക സമ്മര്‍ദ്ദവും അകറ്റന്നതിനും ആരോഗ്യ സുരക്ഷിതത്വത്തിനു ഊന്നല്‍ കൊടുക്കുന്നതിനുമായി എല്ലാ വെള്ളിയാഴ്ചകളിലും മൂന്ന് മുതല്‍ ഏഴു വരെ സമയങ്ങളില്‍ നടത്തുന്ന കൂട്ടായ്മയാണ് സീനിയര്‍ വെല്‍നെസ്സ് പ്രോഗ്രാം. ലോങ്ങ് ഐലന്‍ഡ് ന്യൂഹൈഡ് പാക്കിലുള്ള ക്ലിന്റണ്‍ ജി. മാര്‍ട്ടിന്‍ ഓഡിറ്റോറിയത്തില്‍ നാസ്സോ കൗണ്ടിയുടെ സഹായത്തോടെ ECHO നടത്തുന്ന ഈ പരിപാടിയില്‍ ഇരുന്നൂറിലധികം മുതിര്‍ന്ന പൗരന്മാരാണ് വെള്ളിയാഴ്ച ദിവസങ്ങളില്‍ ഒത്തു കൂടുന്നത്.
മാനസീക ഉല്ലാസത്തിനായി കളികളും ആരോഗ്യ പരിപാലനത്തിനായി യോഗയും എക്‌സര്‍സൈസും ചെയ്യുന്ന മുതിര്‍ന്നവര്‍ക്ക് മറ്റു പലരുമായി ഇടപഴകുന്നതിനാല്‍ വാര്‍ധക്യ കാലത്തുള്ള ഏകാന്തതയില്‍ നിന്നും വിമോചനവും ലഭിക്കുന്നു. ECHO യുടെ സ്വപ്ന പദ്ധതിയായ സീനിയര്‍ വെല്‍നെസ്സ് പരിപാടി ഇനി കൂടുതല്‍ ദിവസങ്ങളിലേക്ക് കൂടി ക്രമീകരിക്കുന്നതിനായുള്ള നടപടികള്‍ ചുമതലക്കാര്‍ നടത്തിവരുന്നു.
പത്താമത് വാര്‍ഷികം ആഘോഷിക്കുന്ന എക്കോ ഈ വര്‍ഷം പത്ത് വീടുകള്‍ കേരളത്തില്‍ നിര്‍മ്മിച്ചു നല്‍കുന്നതിനാണ് പദ്ധതിയിടുന്നത്. അതില്‍ ഏതാനും വീടുകളുടെ പണികള്‍ പുരോഗമിച്ചു കൊണ്ടിരിക്കുന്നു. എക്കോയില്‍ ലഭിക്കുന്ന ഓരോ രൂപയും അത് അര്‍ഹതപ്പെട്ടവര്‍ക്ക് നല്‍കപ്പെടുന്നു എന്നതാണ് പ്രത്യേകത. സ്‌കൂള്‍ കുട്ടികളുടെ ഇടയില്‍ സാമൂഹിക സേവന മനസ്ഥിതി വളര്‍ത്തിയെടുക്കുന്നതിനും അതിനു സന്മനസ്സ് കാണിക്കുന്ന കുട്ടികള്‍ക്കും നേതൃത്വം നല്‍കുന്ന സ്‌കൂളുകള്‍ക്കും പ്രോത്സാഹനമായി നല്‍കുന്നതുമായ ക്യാഷ് അവാര്‍ഡാണ് ‘മദര്‍ തെരേസ്സാ സേവന അവാര്‍ഡ്’. ഫാദര്‍ ഡേവിസ് ചിറമേല്‍ അച്ചനാണ് ഈ പ്രോഗ്രാമിന് കേരളത്തില്‍ നേതൃത്വം നല്‍കുന്നത്.
കിഡ്‌നി ഫെഡറേഷന്‍ ഓഫ് ഇന്ത്യ ചെയര്‍മാന്‍ ഫാ. ഡേവിസ് ചിറമേല്‍ അച്ചന്റെ നേതൃത്വത്തില്‍ കേരളത്തില്‍ നടപ്പാക്കി വരുന്ന ഹംഗര്‍ ഹണ്ട് പരിപാടിയുടെ മുഖ്യ സ്‌പോണ്‍സറാണ് ECHO. കേരളത്തിലുള്ള വിവിധ ഹോട്ടലുകളിലൂടെ ഒരു നേരത്തെ ഭക്ഷണത്തിനായി കഷ്ട്ടപ്പെടുന്ന ജനങ്ങള്‍ക്ക് ഭക്ഷണം നല്‍കുന്ന പദ്ധതിയാണ് ഹംഗര്‍ ഹണ്ട്. ഇതിലൂടെ ആയിരക്കണക്കിനാളുകള്‍ക്ക് ദിവസവും ഒരു നേരത്തെയെങ്കിലും ഭക്ഷണം നല്‍കി വിശപ്പകറ്റുന്നതിനു സഹായകരമാകുന്നു.
ലോങ്ങ് ഐലന്‍ഡിലെ പ്രശ്സത ആരോഗ്യവിദഗ്ദ്ധനായ ഡോ. തോമസ് മാത്യു ചെയര്‍മാന്‍ ആയ ECHO-യില്‍ വിവിധ പരിപാടികള്‍ നടത്തുന്നതിനായി സാബു ലൂക്കോസ്, തോമസ് എം. ജോര്‍ജ് (ജീമോന്‍), ബിജു ചാക്കോ, വര്‍ഗ്ഗീസ് ജോണ്‍, ടി.ആര്‍. ജോയി, ആനി മാത്യു, കെ. ബി. ശാമുവേല്‍, കാര്‍ത്തിക് ധര്‍മ്മ, മാത്യുക്കുട്ടി ഈശോ, വര്‍ഗ്ഗീസ് എബ്രഹാം (രാജു), ബെജി ജോസഫ്, സജി ജോര്‍ജ് തുടങ്ങിയവര്‍ മുന്‍കൈ എടുത്ത് സുതാര്യമായി പ്രവര്‍ത്തിക്കുന്നു. അവാര്‍ഡ് സംബന്ധിച്ചും ECHO യുടെ പ്രവര്‍ത്തനങ്ങള്‍ സംബന്ധിച്ചും കൂടുതല്‍ വിവരങ്ങള്‍ അറിയണമെന്ന് താല്‍പ്പര്യമുള്ളവര്‍ 516-902-4300 എന്ന നമ്പറുമായി ബന്ധപ്പെടാവുന്നതാണ്. Visit: www.echoforhelp.org.
