മുംബൈ: നടന്‍ സല്‍മാന്‍ ഖാന്റെ വീടിനുനേരെ വെടിവയ്പ്പ്. ഇന്ന് പുലര്‍ച്ചെ 4:51 ഓടെയാണ് സംഭവം നടന്നത്. മുംബൈയിലെ ബാന്ദ്ര ഏരിയയിലുള്ള വീടിന് പുറത്താണ് വെടിവെപ്പുണ്ടായത്. ബൈക്കിലെത്തിയ രണ്ട് അജ്ഞാതര്‍ മൂന്ന് റൗണ്ട് വെടിയുതിര്‍ത്തു. സംഭവത്തില്‍ ആര്‍ക്കും പരിക്കേറ്റതായി റിപ്പോര്‍ട്ടില്ല.
സംഭവത്തെ തുടര്‍ന്ന് സല്‍മാന്‍ ഖാന്റെ വീടിന് പുറത്ത് സുരക്ഷ ശക്തമാക്കിയിട്ടുണ്ട്. ക്രൈംബ്രാഞ്ചും ലോക്കല്‍ പോലീസും അന്വേഷണം നടത്തുന്നുണ്ട്.
സല്‍മാന്‍ ഖാനെ കൊല്ലുമെന്ന് ജയിലില്‍ കഴിയുന്ന ഗുണ്ടാസംഘം ലോറന്‍സ് ബിഷ്നോയിയും വാണ്ടഡ് ഗുണ്ടാസംഘം ഗോള്‍ഡി ബ്രാറും നിരവധി തവണ പ്രഖ്യാപിച്ചിരുന്നു. ഇതിനു പിന്നാലെയാണ് ഇന്നത്തെ സംഭവം ഉണ്ടായിരിക്കുന്നത്. മാത്രമല്ല, ലോറന്‍സ് ബിഷ്ണോയിയും ഗോള്‍ഡി ബ്രാറും താരത്തെ ആക്രമിക്കാന്‍ തങ്ങളുടെ ഷൂട്ടര്‍മാരെ മുംബൈയിലേക്ക് അയച്ചതായും ചില റിപ്പോര്‍ട്ടുകളുണ്ട്. ഒന്നിലധികം ഭീഷണികള്‍ കണക്കിലെടുത്ത് മുംബൈ പോലീസ് 24 മണിക്കൂറും സല്‍മാന്‍ ഖാന്റെ വീടിന് പുറത്ത് പോലീസ് സംഘത്തെ വിന്യസിച്ചിട്ടുണ്ട്.
