ന്യൂഡല്‍ഹി: മേഘാലയ മുന്‍ മുഖ്യമന്ത്രി സല്‍സെങ് മാരക് അന്തരിച്ചു. 83 വയസ്സായിരുന്നു. വാര്‍ദ്ധക്യ സഹജമായ അസുഖത്തെ തുടര്‍ന്നായിരുന്നു അന്ത്യം. ആഴ്ചകളായി അദ്ദേഹത്തിന്റെ ആരോഗ്യ സ്ഥിതി മോശമായിരുന്നു.
അഴിമതി രഹിതവും പുരോഗമനപരവുമായ മേഘാലയയ്ക്കുവേണ്ടിയുള്ള നിരന്തരമായ പരിശ്രമത്തിന് പേരുകേട്ട ഇദ്ദേഹത്തെ ‘മിസ്റ്റര്‍ ക്ലീന്‍’ എന്നും വിളിച്ചിരുന്നു.
കൊല്‍ക്കത്തയിലെ സ്‌കോട്ടിഷ് ചര്‍ച്ച് കോളേജില്‍ പഠിച്ച അദ്ദേഹം വിശ്വസ്തനായ കോണ്‍ഗ്രസ് നേതാവായിരുന്നു. 2003ല്‍ മേഘാലയ പ്രദേശ് കോണ്‍ഗ്രസ് കമ്മിറ്റി (എംപിസിസി) പ്രസിഡന്റായും അദ്ദേഹം നിയമിതനായി. 1993 മുതല്‍ 1998 വരെ മേഘാലയ മുഖ്യമന്ത്രിയായി സേവനമനുഷ്ഠിച്ച മാരക്, പാര്‍ട്ടി മാറാതെ 5 വര്‍ഷം മുഴുവന്‍ സേവനമനുഷ്ഠിക്കുന്ന ആദ്യത്തെ നേതാവായി.
