കലിഫോർണിയ : അമേരിക്കയിലെ തദ്ദേശീയ വംശജരായ യുറാക് ട്രൈബിൻ്റെ ഏറെ നാളായുള്ള അപേക്ഷ പരിഗണിച്ച് ക്ലാമത്ത് നദിയിലെ നാലു അണക്കെട്ടുകളും പൊളിച്ചു മാറ്റി. ഡാം പൊളിക്കൽ പ്രക്രിയ പൂർത്തിയായത് കഴിഞ്ഞയാഴ്ചയാണ്. യുഎസ് ചരിത്രത്തിലെ ഏറ്റവും വലിയ അണക്കെട്ട് നീക്കംചെയ്യൽ പദ്ധതിയാണ് പൂർത്തിയായത്. സാൽമൺ മീനുകളുടെ പ്രജനനത്തിന് തടസ്സമാണ് എന്ന കാരണത്താലാണ് അണക്കെട്ടുകൾ പൊളിച്ചു മാറ്റിയത്. യുറാക് ട്രൈബിൻ്റെ പ്രധാന ഭക്ഷണം സാൽമൺ മീനുകളാണ്. അവർ നദിയെ അതിൻ്റെ സ്വാഭാവിക അവസ്ഥയിലേക്ക് തിരികെ കൊണ്ടുവരാൻ പതിറ്റാണ്ടുകളായി പോരാടുകയായിരുന്നു.
അയൺ ഗേറ്റ് അണക്കെട്ട്, കോപ്‌കോ ഡാം 1,കോപ്‌കോ ഡാം2, ജെസി ബോയിൽ ഡാം എന്നീ നാല് ജലവൈദ്യുത അണക്കെട്ടുകളാണ് പൊളിച്ചു മാറ്റിയത്. സാൽമൺ മീനുകൾക്ക് ഇനി മുതൽ ക്ലാമത്ത് നദിയിലും അതിൻ്റെ പോഷകനദികളിലും സ്വതന്ത്രമായി നീന്താൻ സാധിക്കും.
സ്റ്റാഫ് അംഗങ്ങളും നദി സംരക്ഷണ പ്രവർത്തകരും ഉദ്യോഗസ്ഥരും യുറാക്അംഗങ്ങളും നദിക്കരയിൽ ഒത്തുകൂടി നദി സ്വതന്ത്രമായതിൻ്റെ ആഹ്ളാദം പങ്കുവച്ചതായി അണക്കെട്ട് പൊളിച്ചു മാറ്റുന്ന പദ്ധതിയുടെ മേൽനോട്ടം വഹിച്ച ക്ലാമത്ത് റിവർ റിന്യൂവൽ കോർപ്പറേഷൻ്റെ ചീഫ് എക്സിക്യൂട്ടീവ് ഓഫീസർ മാർക്ക് ബ്രാൻസം പറഞ്ഞു,
അമേരിക്കയിലെ തദ്ദേശീയ വംശജരായ യുറാക് ട്രൈബിൻ്റെ ഏറെ നാളായുള്ള അപേക്ഷ മാനിച്ചാണ് ഈ നടപടി. പരമ്പരാഗതമായി മീൻപിടത്തം ഇവരുടെ ജീവിതത്തിന്റെ ഭാഗമാണ്. എല്ലാ ശിശിരകാലത്തും ഇവർ ഒരു വർഷത്തേക്ക് ആവശ്യമുള്ള അത്ര സാൽമൺ മീനുകളെ പിടിക്കുമായിരുന്നു. പിന്നീട് അത് ഉണക്കിയോ ഉപ്പിലിട്ടോ ഫ്രീസുചെയ്തോ ഒരു വർഷത്തേക്ക് സൂക്ഷിച്ചു വയ്ക്കുമായിരുന്നു. എന്നാൽ കുറേ വർഷങ്ങളായി ഇവർക്ക് ആവശ്യത്തിന് മീൻ കിട്ടുന്നില്ല.
യുറാക് വംശജർ ജീവിക്കുന്നത് ക്ലമാത്ത് നദി പരിസരത്താണ്. അവരുടെ ജീവിതവുമായി ഈ നദിക്ക് അഭേദ്യമായ ബന്ധമുണ്ട്. അതുകൊണ്ടു തന്നെ യുറാക്കുകളുടെ ആവശ്യം സർക്കാർ അംഗീകരിക്കുകയായിരുന്നു. വൈദ്യുതി ഉൽപാദനത്തിനും ജലസേചനത്തിനുമായി ധാരാളം അണക്കെട്ടുകൾ നിർമിച്ചിരുന്നു. ഇത് സാൽമൺ മീനുകളുടെ ആവാസവ്യവസ്ഥയെ ബാധിച്ചു എന്ന് യുറാക്കുകൾ പറയുന്നു. കെട്ടിനിൽക്കുന്ന വെള്ളത്തിന് ചൂട് കൂടുതുന്നതും മലിനമാകുന്നതും മീനുകളുടെ സ്വാഭാവിക പരിസ്ഥിതിയെ തകർത്തു. പ്രജനനത്തിനായി കിലോമീറ്റുകളോളം സഞ്ചരിക്കുന്ന ഇവയുടെ സഞ്ചാരപാത തടസ്സപ്പെട്ടു. എന്നിങ്ങനെയാണ് ഇവരുടെ വാദങ്ങൾ. ഇവരുടെ ആവശ്യം പരിഗണിച്ച് ക്ളമാത്ത് നദിയിലെ 4 ഡാമുകൾ സർക്കാർ പൊളിച്ചു മാറ്റി. അതോടെ 400 മൈൽ ദൂരത്ത് നദിക്ക് അണക്കെട്ടുകളില്ല.
four dams on the Klamath River removed for the free movement of Salmon fishes
