ന്യൂഡൽഹി:കുപ്രസിദ്ധ ഗുണ്ടാനേതാവ് ലോറൻസ് ബിഷ്ണോയിയുടെ ഇളയ സഹോദരനും നിരവധി കേസുകളിലെ പ്രതിയുമായ അൻമോൽ ബിഷ്‌ണോയി അമേരിക്കയിൽ പിടിയിലായെന്ന് റിപ്പോർട്ട്. അമേരിക്കൻ പൊലിസ് വൃത്തങ്ങളാണ് ഇത് സംബന്ധിച്ച വാർത്ത പുറത്തുവിട്ടത്.
2022 ൽ പഞ്ചാബി ഗായകൻ സിദ്ധു മൂസ്‌വാലയുടെ കൊലപാതക കേസിലും ഈ വർഷം ജൂണിൽ നടൻ സൽമാൻ ഖാൻ്റെ മുംബൈ വസതിക്ക് പുറത്ത് നടന്ന വെടിവെയ്‌പ്പ് കേസിലുമുൾപ്പെടെ നിരവധി പ്രമാദമായ കേസുകളിലെയും പ്രതിയാണ് അൻമോൽ ബിഷ്‌ണോയി.
അമേരിക്കയിലെ കാലിഫോർണിയയിൽ വെച്ചാണ് അൻമോലിനെ അറസ്റ്റ് ചെയ്തതെന്നാണ് അമേരിക്കൻ പൊലീസ് വൃത്തങ്ങൾ നൽകുന്ന വിവരം.
മഹാരാഷ്ട്ര മുൻ മന്ത്രിയും എൻസിപി (അജിത് പവാർ വിഭാഗം) നേതാവുമായ ബാബ സിദ്ദിഖിയെ കഴിഞ്ഞ മാസം കൊലപ്പെടുത്തിയ കേസിലും ബിഷ്‌ണോയി പ്രതിയാണ്. ഇന്ന് രാവിലെയാണ് ബിഷ്ണോയിയെ കസ്റ്റഡിയിലെടുത്തതെന്നാണ് പൊലീസ് വൃത്തങ്ങൾ അറിയിച്ചത്.
ഈ മാസം ആദ്യം മുംബൈ പൊലീസ് ക്രൈം ബ്രാഞ്ച് ഇയാളെ യുഎസിൽ നിന്ന് തിരികെ കൊണ്ടുവരാനുള്ള നടപടികൾ ആരംഭിച്ചിരുന്നു. മഹാരാഷ്ട്രയിലെ പ്രത്യേക കോടതിയാണ് അൻമോൽ ബിഷ്ണോയിയെ അറസ്റ്റ് ചെയ്യാൻ ജാമ്യമില്ലാ വാറണ്ട് പുറപ്പെടുവിച്ചത്. ഇതിനു പിന്നാലെ ഇൻ്റർപോൾ അൻമോൽ ബിഷ്‌ണോയിക്കായി റെഡ് കോർണർ നോട്ടീസ് പുറപ്പെടുവിക്കുകയും ചെയ്തിരുന്നു. ഇന്ത്യയുടെ ഭീകരവിരുദ്ധ ഏജൻസിയായ ദേശീയ അന്വേഷണ ഏജൻസി കഴിഞ്ഞ മാസം മോസ്റ്റ് വാണ്ടഡ് ലിസ്റ്റിൽ അൻമോൽ ബിഷ്ണോയിയെ ഉൾപ്പെടുത്തിയിരുന്നു. ഇയാളെ പിടികൂടുന്നവർക്ക് 10 ലക്ഷം രൂപ പാരിതോഷികവും പ്രഖ്യാപിച്ചിരുന്നു. ഇതിനിടയിലാണ് അൻമോൽ പിടിയിലായെന്ന റിപ്പോർട്ടുകൾ പുറത്തു വന്നത്.
