ന്യൂഡല്‍ഹി: രശ്മിക മന്ദാനയുമായുള്ള തന്റെ വിവാഹനിശ്ചയത്തെക്കുറിച്ചുള്ള അഭ്യൂഹങ്ങളെക്കുറിച്ച് പ്രതികരിച്ച് വിജയ് ദേവരകൊണ്ട. ഫെബ്രുവരിയില്‍ വിവാഹമോ വിവാഹ നിശ്ചയമോ ഇല്ലെന്ന് താരം വ്യക്തമാക്കി. ‘ഫെബ്രുവരിയില്‍ ഞാന്‍ വിവാഹ നിശ്ചയം നടത്തുകയോ വിവാഹം കഴിക്കുകയോ ചെയ്യുന്നില്ല. രണ്ട് വര്‍ഷം കൂടുമ്പോള്‍ എന്നെ വിവാഹം കഴിപ്പിക്കണമെന്ന് പത്രമാധ്യമങ്ങള്‍ക്ക് നിര്‍ബന്ധമാണെന്ന് തോന്നുന്നുവെന്നും ലൈഫ്സ്‌റ്റൈല്‍ ഏഷ്യയ്ക്ക് അടുത്തിടെ നല്‍കിയ അഭിമുഖത്തില്‍ വിജയ് പറഞ്ഞു.
എല്ലാ വര്‍ഷവും ഈ കിംവദന്തി കേള്‍ക്കുന്നു. അവര്‍ എന്നെ പിടിച്ച് വിവാഹം കഴിപ്പിക്കാന്‍ കാത്ത് നടക്കുന്നുവെന്നും വിജയ് ദേവരകൊണ്ട പറഞ്ഞു. ഫെബ്രുവരി രണ്ടാം വാരത്തില്‍ വിജയ് ദേവരകൊണ്ടയും രശ്മിക മന്ദാനയും വിവാഹ നിശ്ചയം നടത്തുമെന്ന് ചില തെലുങ്ക് മാധ്യമങ്ങള്‍ റിപ്പോര്‍ട്ട് ചെയ്തതോടെയാണ് കിംവദന്തികള്‍ പ്രചരിക്കാന്‍ തുടങ്ങിയത്.
ഗീത ഗോവിന്ദം, ഡിയര്‍ കോമ്രേഡ് തുടങ്ങിയ ചിത്രങ്ങളില്‍ ഒരുമിച്ച് അഭിനയിച്ച വിജയ് ദേവരകൊണ്ടയും രശ്മിക മന്ദാനയും ഡേറ്റിംഗിലാണെന്ന് അഭ്യൂഹങ്ങള്‍ പുറത്തുവന്നതുമുതല്‍ ഇരുവരും വാര്‍ത്തകളില്‍ നിറയുകയായിരുന്നു. കഴിഞ്ഞ വര്‍ഷം ഏപ്രിലില്‍, അഭിനേതാക്കള്‍ ഒരുമിച്ച് ജീവിക്കുന്നുവെന്ന് ഒരു റിപ്പോര്‍ട്ട് വന്നപ്പോള്‍, നടി എക്സില്‍ ‘അയ്യൂ.. അമിതമായി ചിന്തിക്കരുത് ബാബു’ എന്ന് മറുപടി നല്‍കിയിരുന്നു.
2022-ല്‍, കരണ്‍ ജോഹറിന്റെ കോഫി വിത്ത് കരണ്‍ 7 എന്ന ചാറ്റ് ഷോയില്‍, നിങ്ങള്‍ രശ്മിക മന്ദാനയുമായി ഡേറ്റിംഗ് നടത്തുന്നുണ്ടോ എന്ന് വിജയ് ദേവരകൊണ്ടയോട് ചോദിച്ചപ്പോള്‍, ‘ഞങ്ങള്‍ ഒരുമിച്ച് 2 സിനിമകള്‍ ചെയ്തിട്ടുണ്ട്, അവള്‍ ഒരു പ്രിയപ്പെട്ടവളാണ്. എനിക്ക് അവളെ വളരെ ഇഷ്ടമാണ്. അവള്‍ എന്റെ വളരെ നല്ല സുഹൃത്താണ് എന്നാണ് വിജയ് പ്രതികരിച്ചത്.
