രാജ്കോട്ട്: ഇംഗ്ലണ്ടിനെതിരായ മൂന്നാം ടെസ്റ്റിന് തൊട്ടുമുമ്പ് മധ്യനിര ബാറ്റ്സ്മാൻ കെ എൽ രാഹുൽ പുറത്ത്. താരം പൂർണമായി പരിക്കിൽ നിന്ന് മുക്തമാകാത്തതിനെ തുടർന്നാണ് ടീമിൽ നിന്നൊഴിവാക്കിയത്. രാഹുലിന് പകരം രഞ്ജി ട്രോഫിയില്‍ കർണാടകയ്ക്കായി തിളങ്ങുന്ന മലയാളി ബാറ്റർ ദേവ്ദത്ത് പടിക്കല്‍ പകരം ടീമിലെത്തിയേക്കുമെന്ന് ദേശീയമാധ്യമങ്ങൾ റിപ്പോർട്ട് ചെയ്തു.
രാജ്കോട്ടില്‍ ഫെബ്രുവരി 15 നാണ് മൂന്നാം ടെസ്റ്റ് ആരംഭിക്കുക. അവസാന മൂന്ന് ടെസ്റ്റുകള്‍ക്കുള്ള ടീമിനെ ശനിയാഴ്ച പ്രഖ്യാപിച്ചപ്പോള്‍ രവീന്ദ്ര ജഡേജയും കെ എല്‍ രാഹുലും ഉൾപ്പെട്ടിരുന്നു. താരങ്ങൾ കളിക്കുന്ന കാര്യം ഫിറ്റ്നസ് റിപ്പോർട്ട് അടിസ്ഥാനത്തിലായിരിക്കുമെന്നും സെലക്ഷന്‍ കമ്മിറ്റി വ്യക്തമാക്കി. അതേസമയം, രവീന്ദ്ര ജഡേജയെ കളിയ്ക്കാൻ അനുവദിച്ചേക്കും. ബെംഗളൂരുവിലെ ദേശീയ ക്രിക്കറ്റ് അക്കാഡമിയില്‍ തുടരുന്ന രാഹുല്‍ ഇന്ത്യന്‍ ടീമിനൊപ്പം ചേർന്നിട്ടില്ല.
ഹൈദരാബാദില്‍ നടന്ന ആദ്യ ടെസ്റ്റിൽ പരിക്കിനെ തുടർന്ന് കെ എല്‍ രാഹുലിനും രവീന്ദ്ര ജഡേജയ്ക്കും വിശാഖപട്ടണത്തെ രണ്ടാം ടെസ്റ്റ് നഷ്ടമായിരുന്നു. ബാക്കി മത്സരങ്ങളിൽ രാഹുലിനെ കളിപ്പിക്കുന്നത് ആരോഗ്യം വിലയിരുത്തിയ ശേഷമാകും പരിഗണിക്കുക.
IND vs ENG Live updates KL Rahul excluded from Team India for third test against England
