ടെല്‍അവീവ്: ഇസ്രായേല്‍ പ്രധാനമന്ത്രി ബിന്യമിൻ നെതന്യാഹുവിനെതിരെ രൂക്ഷ വിമർശനവുമായി ഫലസ്തീൻ പൗരനായ പാർലമെന്‍റ് അംഗം രംഗത്ത്. നെതന്യാഹു സമാധാനത്തിന്‍റെ സീരിയല്‍ കില്ലറാണെന്ന് പാർലമെന്‍റായ നെസറ്റിനെ അഭിസംബോധന ചെയ്യവെ അയ്മാൻ ഒദേഹ് വിമർശിച്ചു.
നെതന്യാഹുവിനെ സാക്ഷിയാക്കിയായിരുന്നു രൂക്ഷ വിമർശനം. രാഷ്ട്രീയ പാർട്ടിയായ ഹദാഷ്-താല്‍ ലിസ്റ്റിന്‍റെ അധ്യക്ഷനാണ് അയ്മാൻ ഒദേഹ്. നിങ്ങൾ ഗസ്സയിലെ 17,385 കുട്ടികളെ കൊല ചെയ്തു. 825 പേർ ഒരു വയസിന് താഴെ പ്രായമുള്ളവരാണ്. 35,055 കുട്ടികള്‍ അനാഥരായി.
കൊല്ലപ്പെട്ടവരുടെ രക്തം നിങ്ങളെ വേട്ടയാടും. നിങ്ങള്‍ ധിക്കാരം അവസാനിപ്പിക്കണമെന്നും രാജ്യാന്തര ക്രിമിനല്‍ കോടതി മുമ്പാകെ നിങ്ങള്‍ കുറ്റവാളിയാണെന്നും 30 വർഷമായി നിങ്ങള്‍ സമാധാനത്തിന്‍റെ സീരിയല്‍ കില്ലർ ആണെന്നും അയ്മാൻ ഒദേഹ് പറഞ്ഞു.
പാർലമെന്‍റ് സമ്മേളനം നിയന്ത്രിക്കുന്ന സ്പീക്കർ പ്രസംഗം തടയാൻ ശ്രമിച്ചു. ഉടൻ തന്നെ സ്പീക്കർ സുരക്ഷാ ജീവനക്കാരെ വിളിച്ചു വരുത്തിയാണ് അയ്മാനെ സ്ഥലത്ത് നിന്ന് മാറ്റിയത്. സുരക്ഷാ ജീവനക്കാരുടെ നടപടിയില്‍ പാർലമെന്‍റ് അംഗങ്ങളില്‍ ചിലർ ശബ്ദമുയർത്തി പ്രതിഷേധിച്ചു.
Israel MP criticized Benjamin Netanyahu
