കൊച്ചി: റംസാൻ – വിഷു വിപണന മേളകൾ നടത്തുന്ന ഹൈക്കോടതി ഉപാധികളോടെ അനുമതി നൽകി. വിപണന മേളകളെ യാതൊരുതരത്തിലുമുള്ള തെരഞ്ഞെടുപ്പ് പ്രചരണത്തിനും ഉപയോഗിക്കരുതെന്ന നിർദേശം നൽകികൊണ്ടാണ് ജസ്റ്റിസ് ദേവൻ രാമചന്ദ്രൻ അനുമതി നൽകിയത്. ഒരുതരത്തിലുള്ള രാഷ്ട്രീയ നേട്ടത്തിനും ഇത് ഉപയോഗിക്കരുതെന്നും ഹൈക്കോടതി വ്യക്തമാക്കിയിട്ടുണ്ട്.വിപണന ചന്തകളുടെ നടത്തിപ്പിൽ തിരഞ്ഞെടുപ്പ് പെരുമാറ്റ ചട്ടലംഘനം എന്തെങ്കിലും കണ്ടെത്തിയാൽ തിരഞ്ഞെടുപ്പ് കമ്മീഷന് ഇടപെടാനുള്ള പൂർണ്ണ സ്വാതന്ത്ര്യമുണ്ടെന്നും ഹൈക്കോടതി ഉത്തരവിൽ വ്യക്തമാക്കിയിട്ടുണ്ട്. കൺസ്യൂമർഫെഡിന്റെ ഹർജിയിലാണ് ഹൈക്കോടതി അനുമതി ഉത്തരവ് നൽകിയത്. സംസ്ഥാനത്ത് 250 റംസാൻ – വിഷു വിപണന ചന്തകൾ തുടങ്ങാനായിരുന്നു നീക്കം. എന്നാൽ ഇത് വോട്ടർമാരെ സ്വാധീനിക്കുമെന്ന് ചൂണ്ടിക്കാട്ടി തിരഞ്ഞെടുപ്പ് കമ്മീഷൻ തടഞ്ഞിരുന്നു. തുടർന്നാണ് കൺസ്യൂമർഫെഡ് ഹൈക്കോടതിയെ സമീപിച്ചത്.
