ന്യൂഡല്‍ഹി : മുന്‍ മുഖ്യമന്ത്രിയുടെ വസതിക്ക് നേരെ കുക്കി സായുധ സംഘങ്ങളുടെ റോക്കറ്റ് ആക്രമണത്തില്‍ ഒരാള്‍ മരിച്ചു. അഞ്ച് പേര്‍ക്ക് പരിക്കേറ്റു. മൊയ്റാംഗ് പട്ടണത്തിലാണ് റോക്കറ്റ് പതിച്ചത്. സംസ്ഥാന തലസ്ഥാനമായ ഇംഫാലില്‍ നിന്ന് 35 കിലോമീറ്റര്‍ അകലെ ബിഷ്ണുപൂര്‍ ജില്ലയിലെ മൊയ്റാംഗ് നഗരത്തിന്റെ ഹൃദയഭാഗത്തുള്ള ഇന്ത്യന്‍ നാഷണല്‍ ആര്‍മി (ഐഎന്‍എ) മ്യൂസിയത്തില്‍ നിന്ന് 100 മീറ്റര്‍ അകലെയാണ് റോക്കറ്റ് വീണത്.
കുക്കി ഗോത്രവര്‍ഗക്കാരുടെ ആധിപത്യമുള്ള ചുരാചന്ദ്പൂര്‍ ജില്ലയിലെ സമീപ കുന്നുകളില്‍ നിന്ന് ഇന്ന് രാവിലെ രണ്ട് റോക്കറ്റുകള്‍ തൊടുത്തതിന് ശേഷം ഇതേ ജില്ലയില്‍ ഇന്ന് നടക്കുന്ന രണ്ടാമത്തെ റോക്കറ്റ് ആക്രമണമാണിത്. പുലര്‍ച്ചെയുണ്ടായ ആക്രമണത്തില്‍ ആര്‍ക്കും പരിക്കേറ്റിട്ടില്ലെന്ന് പൊലീസ് അറിയിച്ചു. രണ്ട് കെട്ടിടങ്ങള്‍ക്ക് കേടുപാടുകള്‍ സംഭവിച്ചിരുന്നു.
മൂന്നു കിലോമീറ്റര്‍ പരിധിയില്‍ നിന്നാണ് റോക്കറ്റ് തൊടുത്തുവിട്ടതെന്ന് പൊലീസ് വ്യക്തമാക്കി.
