കൊച്ചി: ലിവിങ് ടുഗതർ പങ്കാളിയെ ഭർത്താവായി കണക്കാക്കാനാകില്ലെന്ന് കേരള ഹൈക്കോടതി. ഇത്തരം ബന്ധങ്ങളിൽ പെൺകുട്ടിക്ക് പങ്കാളിയിൽ നിന്നോ പങ്കാളിയുടെ ബന്ധുക്കളിൽ നിന്നോ ശാരീരിക, മാനസിക പീഡനം അനുഭവിക്കേണ്ടി വന്നാൽ ഗാർഹിക പീഡനത്തിന്റെ പരിധിയിൽ വരില്ലെന്നും ഹൈക്കോടതി വ്യക്തമാക്കി.
എറണാകുളം സ്വദേശിയായ യുവാവാണ് വിഷയം ചൂണ്ടിക്കാട്ടി ഹൈക്കോടതിയെ സമീപിച്ചത്. താൻ ഒരു യുവതിയുമായി ലിവിങ് ടുഗതർ ബന്ധത്തിലായിരുന്നു. ഒരു വർഷത്തോളം ഒന്നിച്ചു ജീവിച്ചു. എന്നാൽ, പിന്നീട് തങ്ങൾ പിരിഞ്ഞ സാഹചര്യത്തിൽ ഗാർഹിക പീഡനം ആരോപിച്ച് പങ്കാളിയായ യുവതി പോലീസിൽ പരാതി നൽകുകയായിരുന്നു. ഈ കേസ് റദ്ദാക്കിക്കൊണ്ടാണ് കോടതിയുടെ നിരീക്ഷണം.
നിയമപരമായി വിവാഹം ചെയ്താൽ മാത്രമേ ഭർത്താവ് എന്ന് പറയാനാകൂ. ലിവിങ് ടുഗതർ ബന്ധങ്ങളിൽ പങ്കാളി മാത്രമാണ്. ആയതിനാൽ, ഇത്തരം ബന്ധങ്ങളിലുണ്ടാകുന്ന പീഡനങ്ങൾ ഐ.പി.സി. 498 എ വകുപ്പിന് കീഴിൽ വരില്ലെന്ന് ഹൈക്കോടതി വ്യക്തമാക്കി.
