ന്യൂഡല്‍ഹി: ടാറ്റ ഗ്രൂപ്പും ഫ്രാന്‍സിന്റെ എയര്‍ബസും ചേര്‍ന്ന് സിവിലിയന്‍ ഹെലികോപ്റ്ററുകള്‍ നിര്‍മ്മിക്കാനുള്ള കരാറില്‍ ഒപ്പുവെച്ചതായി ഇന്ത്യന്‍ വിദേശകാര്യ സെക്രട്ടറി വിനയ് ക്വാത്ര അറിയിച്ചു. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന്റെ ഇന്ത്യാ സന്ദര്‍ശനത്തിനിടെയാണ് കരാര്‍ ഒപ്പിട്ടതെന്നും അദ്ദേഹം പറഞ്ഞു. പ്രധാനമന്ത്രി നരേന്ദ്ര മോദിയുടെ സംസ്ഥാനമായ ഗുജറാത്തില്‍ സി-295 ട്രാന്‍സ്‌പോര്‍ട്ട് എയര്‍ക്രാഫ്റ്റ് നിര്‍മ്മിക്കാന്‍ ടാറ്റയും എയര്‍ബസും ഇതിനകം സഹകരിക്കുന്നുണ്ട്.
പ്രധാനമായും തദ്ദേശീയമായി H125 ഹെലികോപ്റ്ററുകള്‍ നിര്‍മ്മിക്കുന്നതിനായാണ് ടാറ്റയും എയര്‍ബസ് വ്യാവസായിക പങ്കാളിത്തത്തില്‍ ഒപ്പു വെച്ചിരിക്കുന്നതെന്ന് ക്വാത്ര വെള്ളിയാഴ്ച മാധ്യമ സമ്മേളനത്തില്‍ പറഞ്ഞു. അതേസമയം ടാറ്റയും എയര്‍ബസും ഇക്കാര്യത്തില്‍ പ്രതികരിച്ചിട്ടില്ല.
പ്രതിരോധ മേഖലയിലെ കൂടുതല്‍ സഹകരണവും മാക്രോണിന്റെ സംസ്ഥാന സന്ദര്‍ശന വേളയില്‍ ചര്‍ച്ച ചെയ്യപ്പെട്ടു. ഇന്ത്യയില്‍ യുദ്ധവിമാനങ്ങളുടെ എഞ്ചിനുകളുടെ നിര്‍മ്മാണത്തില്‍ ഫ്രഞ്ച് എഞ്ചിന്‍ നിര്‍മ്മാതാക്കളായ സഫ്രാന്‍ സഹായിക്കുന്നതിനുള്ള സാധ്യത ഉള്‍പ്പെടെയുള്ള കാര്യങ്ങള്‍ ചര്‍ച്ചയായി.
ഫ്രാന്‍സ് ഇതിനകം തന്നെ ഇന്ത്യയുടെ രണ്ടാമത്തെ വലിയ ആയുധ വിതരണക്കാരാണ്. ഇപ്പോള്‍ നാല് പതിറ്റാണ്ടുകളായി ഇന്ത്യ പ്രധാനമായും അവരുടെ യുദ്ധവിമാനങ്ങളെയാണ് ആശ്രയിക്കുന്നത്. രൂപകല്‍പ്പന, വികസനം, സര്‍ട്ടിഫിക്കേഷന്‍, ഉല്‍പ്പാദനം തുടങ്ങിയ കാര്യങ്ങളില്‍ 100% സാങ്കേതികവിദ്യ കൈമാറ്റം ചെയ്യാന്‍ സഫ്രാന്‍ പൂര്‍ണ്ണമായും തയ്യാറാണ്,” ഫ്രാന്‍സിലെ ഇന്ത്യന്‍ അംബാസഡര്‍ ജാവേദ് അഷ്റഫ് പറഞ്ഞു, ഈ വിഷയത്തില്‍ ചര്‍ച്ചകള്‍ തുടരുമെന്നും അദ്ദേഹം കൂട്ടിച്ചേര്‍ത്തു.
Modi-Macron meet: Tata and France’s Airbus to manufacture helicopters together
