ഐസ്വാള്‍: ഐസ്വാളിന് സമീപം ലെങ്പുയ് വിമാനത്താവളത്തിന്റെ ടേബിള്‍ ടോപ്പ് റണ്‍വേയില്‍ നിന്ന് വിമാനം തെന്നിമാറി കുറ്റിക്കാട്ടിലേക്ക് പതിച്ചു. അപകടത്തില്‍ മ്യാന്‍മര്‍ സൈനിക വിമാനത്തിലെ 14 യാത്രക്കാരും അത്ഭുതകരമായി രക്ഷപ്പെട്ടു. ഇന്നലെയായിരുന്നു അപകടം.
പൈലറ്റ് ഉള്‍പ്പെടെ വിമാനത്തിലുണ്ടായിരുന്ന 14 പേരില്‍ എട്ട് പേര്‍ക്ക് നിസാര പരിക്കുകളുണ്ടെന്നും പ്രാദേശിക ആരോഗ്യ കേന്ദ്രത്തില്‍ ചികിത്സയിലാണെന്നും അധികൃതര്‍ അറിയിച്ചു.
ഒരു വംശീയ വിമത സംഘവുമായുള്ള വെടിവെപ്പിനെ തുടര്‍ന്ന് കഴിഞ്ഞയാഴ്ച ഇന്ത്യയിലേക്ക് കടന്ന 92 മ്യാന്‍മര്‍ സൈനികരെ തിരികെ കൊണ്ടുപോകാനാണ് വിമാനം വന്നതെന്നാണ് വിവരം.
രാവിലെ മ്യാന്‍മര്‍ എയര്‍ഫോഴ്സ് വൈ-8 കാര്‍ഗോ വിമാനം മിസോറം ഗവണ്‍മെന്റ് എയര്‍പോര്‍ട്ടിന്റെ ടേബിള്‍ടോപ്പ് റണ്‍വേയെ മറികടന്ന് അടുത്തുള്ള കുറ്റിക്കാട്ടിലേക്ക് ഇടിച്ചുകയറുകയായിരുന്നു. വിമാനത്തിന്റെ അടിഭാഗം പിളര്‍ന്നിട്ടുണ്ട്.
