ന്യൂഡൽഹി: ലോക്‌സഭാ തിരഞ്ഞെടുപ്പിൽ കോൺഗ്രസിന് പ്രതീക്ഷിച്ച ഫലം ലഭിച്ചില്ലെങ്കിൽ രാഹുൽ ഗാന്ധി മാറിനിൽക്കുന്ന കാര്യം ആലോചിക്കണമെന്ന് രാഷ്ട്രീയ തന്ത്രജ്ഞൻ പ്രശാന്ത് കിഷോർ.
കഴിഞ്ഞ 10 വർഷമായി ചെയ്യുന്ന പ്രവൃത്തിയിൽ വിജയം ഉണ്ടാകുന്നില്ലെങ്കിൽ ഇടവേളയെടുക്കാൻ മടിക്കേണ്ടതില്ലെന്നും അദ്ദേഹം ചൂണ്ടിക്കാട്ടി. പിടിഐ എഡിറ്റർമാരുമായുള്ള ചർച്ചയിലാണ് പ്രശാന്ത് കിഷോർ ഇക്കാര്യം പറഞ്ഞത്.
“എൻ്റെ അഭിപ്രായത്തിൽ ഇത് ജനാധിപത്യ വിരുദ്ധം കൂടിയാണ്,” പ്രശാന്ത് കിഷോർ പറഞ്ഞു. പാർട്ടിയെ പുനരുജ്ജീവിപ്പിക്കുക എന്ന ലക്ഷ്യത്തോടെ കോൺഗ്രസുമായി പ്രശാന്ത് കിഷോർ ഒരിക്കൽ കൈകോർത്തിരുന്നുവെങ്കിലും നേതൃത്വവുമായുള്ള അഭിപ്രായ വ്യത്യാസത്തെ തുടർന്നു പിൻവാങ്ങിയിരുന്നു.
“കഴിഞ്ഞ 10 വർഷമായി നിങ്ങൾ ഒരേ ജോലി ചെയ്യുമ്പോൾ, അതിൽ ഒരു വിജയവും ഉണ്ടാകുന്നില്ലെങ്കിൽ ഇടവേള എടുക്കുന്നതിൽ കുഴപ്പമില്ല. അദ്ദേഹം ചെയ്യുന്ന കാര്യങ്ങൾ ചെയ്യാൻ അഞ്ച് വർഷത്തേക്ക് മറ്റാരെയെങ്കിലും അനുവദിക്കണം. നിങ്ങളുടെ അമ്മ അത് ചെയ്തു,” അദ്ദേഹം പറഞ്ഞു. തൻ്റെ ഭർത്താവ് രാജീവ് ഗാന്ധിയുടെ കൊലപാതകത്തെത്തുടർന്ന് രാഷ്ട്രീയത്തിൽ നിന്ന് വിട്ടുനിൽക്കാനും 1991-ൽ പി വി നരസിംഹ റാവുവിനെ ചുമതലയേൽക്കാനുമുള്ള സോണിയാ ഗാന്ധിയുടെ തീരുമാനത്തെ പരാമർശിച്ചുകൊണ്ട് പ്രശാന്ത് കിഷോർ പറഞ്ഞു.
‘‘എന്താണു കുറവെന്നു കണ്ടെത്തി നികത്തുന്നതാണു നല്ല നേതാവിന്റെ ലക്ഷണം. എന്നാൽ രാഹുലിന്റെ ധാരണ അദ്ദേഹത്തിന് എല്ലാം അറിയാമെന്നാണ്. നിങ്ങൾക്ക് സഹായം ആവശ്യമുണ്ടെന്ന് സ്വയം ബോധ്യപ്പെട്ടില്ലെങ്കിൽ ആർക്കും നിങ്ങളെ സഹായിക്കാനാകില്ല,’’ അദ്ദേഹം പറഞ്ഞു.
