പാലക്കാട്: ഉപതെരഞ്ഞെടുപ്പിൽ സ്ഥാനാര്‍ഥിയായി പ്രഖ്യാപിച്ച ശേഷം ആദ്യമായി രാഹുല്‍ മാങ്കൂട്ടത്തില്‍ പാലക്കാട്ടെത്തി. വലിയ സ്വീകരണമാണ് പ്രവർത്തകർ ഒരുക്കിയത്. പാലക്കാട് നഗരത്തില്‍ ആവേശ റോഡ് ഷോയോടെ തെരഞ്ഞെടുപ്പ് പ്രചാരണത്തിനും രാഹുൽ തുടക്കം കുറിച്ചു. വിവാദങ്ങൾക്ക് പ്രസക്തിയില്ലെന്നും വലിയ ഭൂരിപക്ഷത്തിൽ ജയിക്കുമെന്ന് ഉറപ്പാണെന്നും രാഹുൽ ആത്മവിശ്വാസം പ്രകടിപ്പിച്ചു.
റോഡ് ഷോ നയിച്ച് മുൻ എം എൽ എയും വടകര എം പിയുമായ ഷാഫി പറമ്പിലും രാഹുലിനെ വാരിപ്പുണർന്നു. വടകരയില്‍ സി പി എമ്മിനെയും ബി ജെ പിയെയും തോല്‍പിക്കുക എന്നതായിരുന്നു ഡീലെന്നും പാലക്കാട്ടും ആ ഡീല്‍ തന്നെയാണെന്നും ഷാഫി പറഞ്ഞു. തനിക്ക് കഴിഞ്ഞ തവണ ലഭിച്ചതിനേക്കാൾ മികച്ച വിജയം രാഹുലിന് ലഭിക്കും. അഞ്ചക്ക സംഖ്യ ഭൂരിപക്ഷം ലഭിക്കുമെന്നും ജനങ്ങളാണ് ആത്മവിശ്വാസമെന്നും ഷാഫി പറമ്പില്‍ പറഞ്ഞു. യൂത്ത് ലീഗ് ജനറല്‍ സെക്രട്ടറി പി കെ ഫിറോസ്, അബിന്‍ വര്‍ക്കി തുടങ്ങി നിരവധി നേതാക്കളും രാഹുലിനൊപ്പം മണ്ഡലത്തിലെ ആദ്യ പ്രചാരണത്തിൽ പങ്കുചേര്‍ന്നു.
