മോസ്കോ: യുഎസ് പത്രപ്രവർത്തകൻ ഇവാൻ ഗെർഷ്‌കോവിച്ച് ചാരവൃത്തിയിൽ കുറ്റക്കാരനാണെന്ന് റഷ്യൻ കോടതി കണ്ടെത്തി. അദ്ദേഹത്തെ 16 വർഷത്തെ കഠിനമായ തടവ് ശിക്ഷയ്ക്ക് വിധിച്ചു. 30 വർഷത്തിലേറെ മുമ്പ് ശീതയുദ്ധം അവസാനിച്ചതിന് ശേഷം റഷ്യയിൽ ചാരവൃത്തി നടത്തിയതിന് ഒരു യുഎസ് പത്രപ്രവർത്തകൻ്റെ ആദ്യത്തെ ശിക്ഷാവിധിയാണിത്.
കഴിഞ്ഞ മാർച്ചിൽ മോസ്കോയിൽ നിന്ന് 1,600 കിലോമീറ്റർ (1,000 മൈൽ) കിഴക്കുള്ള യെക്കാറ്റെറിൻബർഗ് നഗരത്തിൽ ഒരു റിപ്പോർട്ടിംഗ് യാത്രയ്ക്കിടെയാണ് ദി വാൾസ്ട്രീറ്റ് ജേർണൽ റിപ്പോർട്ടറായ ഗെർഷ്‌കോവിച്ച് അറസ്റ്റിലായത്.
അദ്ദേഹം സെൻട്രൽ ഇൻ്റലിജൻസ് ഏജൻസിയിൽ (സിഐഎ) പ്രവർത്തിക്കുന്നുണ്ടെന്ന് പ്രോസിക്യൂട്ടർമാർ ആരോപിച്ചു. എന്നാൽ ഗെർഷ്‌കോവിച്ചും അദ്ദേഹത്തിന്റെ മാധ്യമ സ്ഥാപനമായ ഡബ്ല്യുഎസ്‌ജെയും യുഎസും ഈ ആരോപണം നിഷേധിച്ചു.
വിധിക്കെതിരെ അപ്പീൽ നൽകാൻ ഇരുവിഭാഗത്തിനും 15 ദിവസത്തെ സമയമുണ്ടെന്ന് ജഡ്ജി പറഞ്ഞു.
“ഇവാൻ്റെ മോചനത്തിനായി സമ്മർദ്ദം ചെലുത്താനും അവൻ്റെ കുടുംബത്തെ പിന്തുണയ്ക്കാനും സാധ്യമായതെല്ലാം ഞങ്ങൾ ചെയ്യുന്നത് തുടരും. പത്രപ്രവർത്തനം ഒരു കുറ്റമല്ല. അദ്ദേഹത്തെ മോചിപ്പിക്കുന്നതുവരെ ഞങ്ങൾ വിശ്രമിക്കില്ല. ഇത് ഇവിടെ അവസാനിപ്പിക്കണം,” വാൾസ്ട്രീറ്റ് ജേർണൽ പബ്ലിഷർ അൽമർ ലത്തൂർ, ചീഫ് എഡിറ്റർ എമ്മ ടക്കർ എന്നിവർ പ്രസ്താവനയിൽ പറഞ്ഞു.
ഗെർഷ്‌കോവിച്ചിനെ വിലപേശൽ ചിപ്പായി റഷ്യ കൈവശം വച്ചിരിക്കുകയാണെന്ന് അമേരിക്ക കുറ്റപ്പെടുത്തി. ഇത് വിദേശ ജയിലുകളിൽ കഴിയുന്ന റഷ്യൻ പൗരന്മാരായ തടവുകാരുടെ കൈമാറ്റത്തിന് ഉപയോഗിക്കുമെന്നും യുഎസ് ചൂണ്ടിക്കാട്ടി.
