![](https://www.nrireporter.com/wp-content/uploads/2024/03/rlv-ramakrishnan.jpg)
തിരുവനന്തപുരം: ആര് എല് വി രാമകൃഷ്ണനെതിരെ ജാതി അധിക്ഷേപം നടത്തിയ സത്യഭാമക്കെതിരെ നടപടിയെടുക്കണമെന്നാവശ്യപ്പെട്ട് പട്ടികജാതി പട്ടികവര്ഗ കമ്മീഷൻ സംസ്ഥാന പൊലീസ് മേധാവിക്ക് നിർദേശം നൽകി. സമഗ്രമായ അന്വേഷണം നടത്തി 10 ദിവസത്തിനുള്ളില് റിപ്പോര്ട്ട് സമര്പ്പിക്കാനും ഡി ജി പിക്ക് കമ്മീഷന് നിര്ദേശം നല്കിയിട്ടുണ്ട്. നേരത്തെ വിഷയത്തിൽ മനുഷ്യാവകാശ കമ്മീഷനും ഇടപെട്ടിരുന്നു.വിവാദത്തിന് പിന്നാലെ, ആര്എല്വി രാമകൃഷ്ണനെ നൃത്താവതരണത്തിന് ക്ഷണിച്ച് കേരള കലാമണ്ഡലം രംഗത്തെത്തി. ക്ഷണം രാമകൃഷ്ണന് സ്വീകരിച്ചു. ചൊവ്വാഴ്ച കലാമണ്ഡലത്തിന്റെ കൂത്തമ്പലത്തിലാണ് മോഹിനിയാട്ടം അവതരിപ്പിക്കുക. ആദ്യമായാണ് തനിക്ക് ഇത്തരമൊരു അവസരം കിട്ടുന്നതെന്ന് ആര്എല്വി രാമകൃഷ്ണന് പറഞ്ഞു. കലാമണ്ഡലത്തില് ഗവേഷക വിദ്യാര്ത്ഥി കൂടിയായിരുന്നു രാമകൃഷ്ണന്.നേരത്തെ നൃത്താവതരണത്തിനുള്ള സുരേഷ് ഗോപിയുടെ ക്ഷണം രാമകൃഷ്ണന് നിരസിച്ചിരുന്നു. തനിക്ക് അന്നേ ദിവസം തിരക്കാണെന്ന് ചൂണ്ടിക്കാണിച്ചാണ് സുരേഷ് ഗോപിയുടെ ക്ഷണം രാമകൃഷ്ണന് നിരസിച്ചത്. കഴിഞ്ഞദിവസം ഒരു യൂട്യൂബ് ചാനലിന് നല്കിയ അഭിമുഖത്തിലായിരുന്നു രാമകൃഷ്ണനെതിരായ സത്യഭാമയുടെ അധിക്ഷേപം. പുരുഷന്മാര് മോഹിനിയാട്ടം കളിക്കുന്നത് അരോചകമാണെന്നും ഇയാള്ക്ക് കാക്കയുടെ നിറമാണെന്നുമായിരുന്നു സത്യഭാമയുടെ വാക്കുകള്.
SC ST commission recommend strict action against Sathyabhama Caste Abuse RLV Ramakrishnan case