![](https://www.nrireporter.com/wp-content/uploads/2024/07/justice-hema-commission.jpg)
തിരുവനന്തപുരം: സിനിമ മേഖലയിലെ പ്രശ്നങ്ങളെക്കുറിച്ചു പഠിക്കാന് നിയോഗിച്ച ജസ്റ്റിസ് ഹേമ കമ്മിറ്റി റിപ്പോര്ട്ട് ഇന്ന് പുറത്ത്. വൈകീട്ട് 3.30ന് സാംസ്കാരിക വകുപ്പാണ് റിപ്പോര്ട്ട് പുറത്തുവിടുക. റിപ്പോര്ട്ടിലുള്ള വ്യക്തികളുടെ സ്വകാര്യതയിലേക്കു കടക്കാത്ത, ആര്.ടി.ഐ നിയമപ്രകാരം വിലക്കിയ വിവരങ്ങള് ഒഴിവാക്കിയാണ് 233 പേജുകളുള്ള റിപ്പോര്ട്ട് പുറത്തുവിടുക.
റിപ്പോര്ട്ട് സമര്പ്പിച്ച് നാലു വര്ഷം ആകുമ്പോഴാണ് വിവരങ്ങള് പുറത്തുവിടാന് സര്ക്കാര് തയാറായത്. വിവരാവകാശ കമ്മിഷണർ ഡോ.എ.എ. അബ്ദുല് ഹക്കീമിന്റെ ഉത്തരവിനെ തുടര്ന്നാണ് നടപടി.
സിനിമാ മേഖലയിലെ പ്രശ്നങ്ങളെ കുറിച്ചു പഠിക്കാന് സര്ക്കാര് നിയോഗിച്ച ജസ്റ്റിസ് ഹേമ കമ്മിഷന്2019 ഡിസംബര് 31ന് റിപ്പോര്ട്ട് സമര്പ്പിച്ചെങ്കിലും സര്ക്കാര് ഇതുവരെ പുറത്തുവിട്ടിരുന്നില്ല. റിപ്പോര്ട്ട് പുറത്ത് വിടാത്തതിനെതിരെ സിനിമയിലെ സ്ത്രീകളുടെ സംഘടനയായ ഡബ്ല്യുസിസിയും മാധ്യമപ്രവര്ത്തകരും രാഷ്ട്രീയ പ്രവര്ത്തകരുമെല്ലാം രംഗത്ത് വന്നിരുന്നു.
ലിംഗാടിസ്ഥാനത്തിലുള്ള വേതന വ്യത്യാസം, സെറ്റില് സ്ത്രീകള്ക്കുള്ള സൗകര്യമില്ലാത്തതിന്റെ പ്രശ്നങ്ങള്, പരാതി പരിഹാരത്തിനുള്ള ശരിയായ ഫോറത്തിന്റെ അഭാവം തുടങ്ങിയവും കമ്മീഷന് റിപ്പോട്ടില് സൂചിപ്പിച്ചിട്ടുണ്ട്.
2017ലെ നടിയെ അക്രമിച്ച സംഭവത്തിന് ശേഷമാണ് സിനിമയ്ക്കുള്ളിലെ സ്ത്രീകള് നേരിടുന്ന പ്രശ്നങ്ങള് ആഴത്തില് പഠിക്കുന്നതിന് ഹേമ കമ്മീഷന് നിയമിക്കുന്നത്. തുടര്ന്ന് അതേ വര്ഷം ജൂലൈയില് ജസ്റ്റിസ് കെ ഹേമ അധ്യക്ഷയായി മുന് ഐഎഎസ് ഉദ്യോഗസ്ഥ കെബി വത്സല കുമാരി, നടി ശാരദ എന്നിവരടങ്ങിയ മൂന്നംഗ കമ്മീഷന് സര്ക്കാര് രൂപീകരിക്കുകയായിരുന്നു.