ഫ്ളോറിഡ: ഫ്ളോറിഡയിലെ പാം ബീച്ച് കൗണ്ടി കണ്‍വെന്‍ഷന്‍ സെന്ററില്‍ ട്രപിന്റെ വിജയം ആഘോഷിക്കാന്‍ ഒത്തുകൂടിയവരോടായി ട്രംപ് സംസാരിച്ചത് അങ്ങേയറ്റം ഊര്‍ജ്ജവും സന്തോഷവും നിറഞ്ഞ മുഖത്തോടെയായിരുന്നു. വിജയം ഉറപ്പിച്ചതായി വിവിധ അമേരിക്കന്‍ മാധ്യമങ്ങള്‍ പ്രചരിപ്പിച്ചതിന് പിന്നാലെ ട്രംപ് തന്റെ അനുയായികളോട് സംസാരിച്ചു. ട്രംപിന്റെ പേരുവിളിച്ച് ആര്‍ത്തിരമ്പുന്ന അനുയായികളോട് സംസാരിക്കവെ അദ്ദേഹം പറഞ്ഞു, ‘അമേരിക്ക ഞങ്ങള്‍ക്ക് അഭൂതപൂര്‍വവും ശക്തവുമായ അധികാരം നല്‍കിയിട്ടുണ്ട്’.
തന്റെ വൈസ്പ്രസിഡന്റാകാന്‍ പോകുന്ന ജെ ഡി വാന്‍സിനെയും ഭാര്യ-ഇന്ത്യവംശജയായ ഉഷ ചിലുകുരി വാന്‍സിനെയും അദ്ദേഹം പ്രശംസിച്ചു. ഇപ്പോള്‍ എനിക്ക് വൈസ് പ്രസിഡന്റ്-ഇലക്റ്റ് ജെഡി വാന്‍സ് എന്ന് പറയാം. അദ്ദേഹത്തിന്റെ ശ്രദ്ധേയയും സുന്ദരിയുമായ ഭാര്യയേയും അഭിനന്ദിക്കുന്നുവെന്നും ട്രംപ് പറഞ്ഞു.
”ഇന്ന് രാത്രി ഒരു കാരണത്താല്‍ ഞങ്ങള്‍ ചരിത്രം സൃഷ്ടിച്ചു, ആരും വിചാരിക്കാത്ത പ്രതിബന്ധങ്ങളെ ഞങ്ങള്‍ അതിജീവിച്ചു എന്നതാണ് ആ കാരണം, നമ്മുടെ രാജ്യം ഇതുവരെ കണ്ടിട്ടില്ലാത്ത രാഷ്ട്രീയ വിജയമാണിത്” എന്നും ട്രംപ് പ്രസംഗത്തില്‍ വ്യക്തമാക്കി.
