വാഷിംഗ്ടൺ: ആഗോള വ്യാപാരത്തെ തടസ്സപ്പെടുത്തുകയും ജീവൻ അപകടത്തിലാക്കുകയും ചെയ്ത ഹൂതി വിമതരുടെ കപ്പൽ ഗതാഗതത്തിന് നേരെയുള്ള ആവർത്തിച്ചുള്ള ആക്രമണങ്ങൾക്ക് മറുപടിയായി അമേരിക്കയും ബ്രിട്ടനും. ശനിയാഴ്ച യെമനിലെ ഡസൻ കണക്കിന് ഹൂതി കേന്ദ്രങ്ങളിൽ യുഎസും യുകെയും സംയുക്ത ആക്രമണം നടത്തി.
ജനുവരി 28 ന് ജോർദാനിൽ മൂന്ന് യുഎസ് സൈനികർ കൊല്ലപ്പെട്ടതിന് മറുപടിയായി ഇറാഖിലെയും സിറിയയിലെയും ഇറാനുമായി ബന്ധപ്പെട്ട ലക്ഷ്യ കേന്ദ്രങ്ങൾക്കെതിരെ ഏകപക്ഷീയമായ അമേരിക്കൻ ആക്രമണത്തിന്റെ പിന്നാലെയാണ് യെമനിലെ സംയുക്ത വ്യോമാക്രമണം.
അന്താരാഷ്ട്ര, വാണിജ്യ കപ്പലുകൾക്കും ചെങ്കടലിലൂടെ സഞ്ചരിക്കുന്ന നാവിക കപ്പലുകൾക്കും എതിരെയുള്ള ഹൂതികളുടെ തുടർച്ചയായ ആക്രമണങ്ങൾക്ക് മറുപടിയായി യെമനിലെ 13 സ്ഥലങ്ങളിലായി 36 ഹൂതി കേന്ദ്രങ്ങൾ യുഎസും ബ്രിട്ടനും ആക്രമിച്ചതായി പ്രസ്താവനയിൽ പറയുന്നു. മറ്റ് രാജ്യങ്ങളും ആക്രമണത്തിന് പിന്തുണ നൽകിയിരുന്നു.
“ആഗോള വ്യാപാരത്തെയും നിരപരാധികളായ നാവികരുടെ ജീവിതത്തെയും ഭീഷണിപ്പെടുത്താൻ ഹൂതികൾ ഉപയോഗിക്കുന്ന സ്രോതസുകളെ തടസ്സപ്പെടുത്താനും ഇല്ലാതാക്കാനുമാണ് ഈ ആക്രമണങ്ങൾ,” പ്രസ്താവനയിൽ പറയുന്നു.
ആക്രമണം ഹൂതികളുടെ ആയുധ സംഭരണ കേന്ദ്രങ്ങൾ, മിസൈൽ സംവിധാനങ്ങൾ, ലോഞ്ചറുകൾ, വ്യോമ പ്രതിരോധ സംവിധാനങ്ങൾ, റഡാറുകൾ എന്നിവയുമായി ബന്ധപ്പെട്ട കേന്ദ്രങ്ങളെ ലക്ഷ്യം വച്ചുള്ളതാണ്.
ചെങ്കടലിൽ കപ്പലുകൾക്കെതിരെ വിക്ഷേപിക്കാൻ തയ്യാറെടുത്തിരുന്ന ആറ് ഹൂതി കപ്പൽ വിരുദ്ധ മിസൈലുകൾക്കെതിരെ ശനിയാഴ്ച യുഎസ് സേന വെവ്വേറെ ആക്രമണം നടത്തിയതായി സെൻട്രൽ കമാൻഡ് (സെൻ്റ്കോം) അറിയിച്ചു.
കഴിഞ്ഞ ദിവസം യെമനടുത്ത് എട്ട് ഡ്രോണുകൾ യുഎസ് സേന വെടിവച്ചിട്ടതായും വിക്ഷേപിക്കുന്നതിന് മുമ്പ് നാലെണ്ണം കൂടി നശിപ്പിച്ചതായും സൈനിക കമാൻഡ് ശനിയാഴ്ച പറഞ്ഞു.
നിലത്ത് പതിച്ച നാല് ഡ്രോണുകളും ഹൂതികളുടേതാണെന്ന് സെന്‌റ്കോം പറഞ്ഞു.
