ലോസ് ഏഞ്ചൽസ്: 2025 ലെ ഓസ്കർ നോമിനേഷനുകൾ ഇന്ന് പ്രഖ്യാപിക്കും. ഇന്ത്യൻ സമയം രാത്രി 7 മണിക്ക് (പ്രാദേശിക സമയം 5.30 എ എം) ഓസ്കർ അക്കാദമിയുടെ സാമുവൽ ഗോൾഡ്‌വിൻ തിയേറ്ററിലാണ് പ്രഖ്യാപനം നടക്കുക. ബോവൻ യാങ്ങും റേസൽ സെന്നോട്ടിയും ചേർന്നാണ് നാമനിർദ്ദേശങ്ങൾ പ്രഖ്യാപിക്കുക. അക്കാദമിയുടെ ഡിജിറ്റൽ ചാനലുകളടക്കമുള്ള പ്ലാറ്റ്‌ഫോമുകളിൽ നോമിനേഷൻ പ്രഖ്യാപനം തത്സമയം സംപ്രേഷണം ചെയ്യും.
കങ്കുവ, ആടുജീവിതം, ഓൾ വീ ഇമാജിൻ അസ് ലൈറ്റ് എന്നീ ഇന്ത്യൻ ചിത്രങ്ങൾ ഇത്തവണ മത്സര രംഗത്തുണ്ട്. ബ്ലെസിയുടെ സംവിധാനത്തിൽ 2024ൽ പുറത്തിറങ്ങിയ ആടുജീവിതം മികച്ച ചിത്രം എന്ന വിഭാഗത്തിലാണ് മത്സരിക്കുന്നത്. 23 വിഭാഗങ്ങളിലായാണ് അവാർഡുകൾ സമ്മാനിക്കുന്നത്. ദ ബ്രൂട്ടലിസ്റ്റ്, എമിലിയ പെരസ്, കോൺക്ലേവ്, എ കംപ്ലീറ്റ് അൺനോൺ, വിക്കഡ് എന്നീ സിനിമകൾ നോമിനേഷനുകൾ വാരിക്കൂട്ടുമെന്നാണ് പ്രതീക്ഷ. കാട്ടുതീ കാരണം രണ്ട് തവണ നോമിനേഷൻ പ്രഖ്യാപനം മാറ്റിവച്ചിരുന്നു. മാർച്ച് രണ്ടിനാണ് അവാർഡുകൾ സമ്മാനിക്കുക.
സഹനടൻ, സഹനടി, ആനിമേറ്റഡ് ഷോർട്ട് ഫിലിം, കോസ്റ്റ്യൂം ഡിസൈൻ, ലൈവ് ആക്ഷൻ ഷോർട്ട് ഫിലിം, മേക്കപ്പും ഹെയർസ്റ്റൈലിങ്ങും, സംഗീതം (ഒറിജിനൽ സ്കോർ), തിരക്കഥ(അവലംബിതം), തിരക്കഥ(ഒറിജിനൽ) എന്നീ വിഭാഗങ്ങളിലെ നോമിനേഷനുകൾ ആണ് ആദ്യം പ്രഖ്യാപിക്കുക.മികച്ച നടൻ, മികച്ച നടി, ആനിമേറ്റഡ് ഫീച്ചർ ഫിലിം, ഛായാഗ്രഹണം, സംവിധാനം, ഡോക്യുമെന്ററി ഫീച്ചർ ഫിലിം, ഡോക്യുമെന്ററി ഷോർട്ട് ഫിലിം, ഫിലിം എഡിറ്റിംഗ്, അന്താരാഷ്ട്ര ഫീച്ചർ ഫിലിം, സംഗീതം(ഒറിജിനൽ), മികച്ച ചിത്രം, പ്രൊഡക്ഷൻ ഡിസൈൻ, ശബ്ദം, വിഷ്വൽ ഇഫക്റ്റ് എന്നീ വിഭാഗങ്ങളിലെ നോമിനേഷനുകൾ രണ്ടാമത്തെ സെക്ഷനിലുമാകും പ്രഖ്യാപിക്കുന്നത്. 97-ാമത് അക്കാദമി അവാർഡ് ദാന ചടങ്ങ് 2025 മാർച്ച് 2-ന് ലോസ് ഏഞ്ചൽസിലെ ഡോൾബി തിയേറ്ററിൽ നടക്കും. ഒബ്രിയൻ ഇവന്റ് പരിപാടിയുടെ ആതിഥേയത്വം വഹിക്കും.
