സെനെക്ക (കന്‍സാസ്) : കന്‍സാസിലെ സെനെക്ക പട്ടണത്തിലുള്ള തന്റെ ഇടവക റെക്ടറിയില്‍ (പുരോഹിത ഭവനം) വ്യാഴാഴ്ച ഒരു കത്തോലിക്കാ പുരോഹിതനെ ഒരാള്‍ വെടിവച്ചു കൊന്നുവെന്ന് പള്ളി അധികൃതര്‍ അറിയിച്ചു. ഫാ. അരുള്‍ കാരസാലയാണ് വ്യാഴാഴ്ച രാവിലെയോടെ ദാരുണമായി കൊല്ലപ്പെട്ടത്. കന്‍സാസ് സിറ്റി അതിരൂപതയിലെ ആര്‍ച്ച് ബിഷപ്പ് ജോസഫ് നൗമാന്‍ ഒരു ഫേസ്ബുക്ക് പോസ്റ്റിലൂടെയാണ് മരണവാര്‍ത്ത പങ്കുവെച്ചത്.
2011 മുതല്‍ സെനെക്കയിലെ സെന്റ്‌സ് പീറ്റര്‍ ആന്‍ഡ് പോള്‍ കാത്തലിക് ചര്‍ച്ചില്‍ പാസ്റ്ററായിരുന്നു കാരസാല. 1994-ല്‍ ഇന്ത്യയില്‍ വെച്ച് പുരോഹിതനായി പട്ടം സ്വീകരിച്ച അദ്ദേഹം 2004 മുതല്‍ കന്‍സാസില്‍ സേവനമനുഷ്ഠിച്ചു. 2011-ല്‍ യുഎസ് പൗരത്വം നേടുകയും ചെയ്തു. വെടിയേറ്റ ഉടനെ അദ്ദേഹത്തെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. കൊലപാതകി പിടിയിലായിട്ടുണ്ടെന്നാണ് സൂചന. ആരാണ് പുരോഹിതനെ വെടിവച്ചതെന്നോ എന്തിനാണെന്നോ വ്യക്തമല്ല.
സെനെക്ക പൊലീസ് ഡിപ്പാര്‍ട്ട്മെന്റിലെയും നെമാഹ കൗണ്ടി ഷെരീഫ് ഓഫീസിലെയും ഉദ്യോഗസ്ഥര്‍ പുരോഹിതന്റെ മരണം സംബന്ധിച്ച് വിവരങ്ങള്‍ പങ്കുവയ്ക്കാന്‍ വിസമ്മതിച്ചെന്ന് അസോസിയേറ്റഡ് പ്രസ് റിപ്പോര്‍ട്ട് ചെയ്തു.
