കോട്ടയം: മധ്യവര്‍ഗത്തെയും കര്‍ഷകരെയും പ്രതിനിധാനംചെയ്യുന്ന അധ്വാനവര്‍ഗസിദ്ധാന്തമെഴുതിയ കെ.എം. മാണിയുടെ ആശയങ്ങളെ, മാണിസമെന്ന പേരില്‍ കേരള കോണ്‍ഗ്രസ് എം തത്ത്വശാസ്ത്രമായി പ്രഖ്യാപിക്കും. ഇതിന്റെ കേളികൊട്ടാണ് കോട്ടയത്ത് യൂത്ത് ഫ്രണ്ട് എമ്മിന്റെ നേതൃത്വത്തില്‍ നടക്കുന്ന മാണിസം യൂത്ത് കോണ്‍ക്ലേവ്.
കര്‍ഷകരുടെയും മധ്യവര്‍ഗത്തിന്റെയും പാര്‍ട്ടി എന്ന നിലയില്‍, കേരളത്തിലെ ഭൂരിഭാഗത്തിന്റെയും ആശയങ്ങളെ പ്രതിനിധാനം ചെയ്യുന്നതാണ് അധ്വാനവര്‍ഗസിദ്ധാന്തം എന്നും നേതാക്കള്‍ പറയുന്നു. ഇപ്പോള്‍ കേരളം ചര്‍ച്ചചെയ്യുന്ന സ്റ്റാര്‍ട്ടപ്പ് എന്ന സംരംഭകത്വവികസനത്തെപ്പറ്റി വര്‍ഷങ്ങള്‍ക്ക് മുന്‍പ് തന്നെ കെ.എം. മാണി പരാമര്‍ശിച്ചിട്ടുണ്ട്.
തന്റെ ബജറ്റുകളില്‍ സാധാരണക്കാരായ യുവാക്കളുടെ വികസനസ്വപ്നങ്ങള്‍ യാഥാര്‍ഥ്യമാക്കാന്‍ അദ്ദേഹം തുകനീക്കിവെച്ചിരുന്നു. അതുകൊണ്ടുതന്നെ മാണിസം എന്നത് കേരളത്തിന്റെ വികസനപ്രത്യയശാസ്ത്രം ആണെന്നും നേതാക്കള്‍ പറയുന്നു. യൂത്ത് ഫ്രണ്ട് എം മാണിസം യൂത്ത് കോണ്‍ക്ലേവ് തുടങ്ങി കോട്ടയത്തെ കെ.സി. മാമ്മന്‍മാപ്പിള ഹാളില്‍ സംസ്ഥാന പ്രസിഡന്റ് സിറിയക് ചാഴികാടന്‍ പതാക ഉയര്‍ത്തി. ഇതിന് മുന്നോടിയായി യൂത്ത് ഫ്രണ്ട് എം. നേതാക്കളുടെ നേതൃത്വത്തില്‍, പാലായിലെ കെ.എം. മാണിയുടെ കബറിടത്തില്‍ പുഷ്പാര്‍ച്ചന നടത്തി.
15-ന് വൈകീട്ട് കെ.എം.മാണി യൂത്ത് ബ്രിഗേഡിന്റെ മാര്‍ച്ച് പാസ്റ്റില്‍ കേരള കോണ്‍ഗ്രസ് എം. ചെയര്‍മാന്‍ ജോസ് കെ.മാണി അഭിവാദ്യം സ്വീകരിക്കും. മാണിസം യൂത്ത് കോണ്‍ക്ലേവ് അദ്ദേഹം ഉദ്ഘാടനംചെയ്യും. സംസ്ഥാന പ്രസിഡന്റ് സിറിയക് ചാഴികാടന്‍ അധ്യക്ഷതവഹിക്കും.
Kerala Congress (M) manism ideology
