ഇടുക്കി: ആർട്ടിഫിഷ്യൽ ഇന്‍റലിജൻസ് (എഐ) മൂത്താൽ സോഷ്യലിസത്തിന്‍റെ പ്രസക്തി കൂടുമെന്ന നിലപാട് സി പി എം സംസ്ഥാന സെക്രട്ടറി എം വി ഗോവിന്ദൻ തിരുത്തി. എ ഐ സംവിധാനം വഴി ഉൽപ്പാദിപ്പിക്കുന്ന സമ്പത്ത് മുതലാളിത്ത രാജ്യങ്ങളിൽ കുന്നുകൂടും എന്നും ഇത് ചൂഷണത്തിന് വഴിവയ്ക്കും എന്നുമാണ് ഇന്ന് എം വി ഗോവിന്ദൻ ഇടുക്കി ജില്ലാ സമ്മേളനം ഉദ്‌ഘാടനം ചെയ്ത് പറഞ്ഞത്.
സോഷ്യലിസത്തിലേക്കുള്ള വഴിയാണ് എ ഐ എന്നായിരുന്നു കണ്ണൂരിൽ എം വി ഗോവിന്ദൻ കഴിഞ്ഞ ദിവസം പ്രസംഗിച്ചത്. ഇത് വലിയ തോതിൽ ചർച്ചയുമായിരുന്നു. അതിനിടയിൽ ഇന്നലെ സി പി എം പാർട്ടി കോൺഗ്രസിനുള്ള കരട് രാഷ്ട്രീയ പ്രമേയത്തിൽ എ ഐക്കെതിരെ വിമർശനമുണ്ടായിരുന്നു. എ ഐ തൊഴിൽ ഇല്ലാതാക്കുമെന്ന കരട് രാഷ്ട്രീയ പ്രമേയത്തിന് പിന്നാലെയാണ് സി പി എം സംസ്ഥാന സെക്രട്ടറിയുടെയും നിലപാടുമാറ്റം.
