ഡൽഹി: കോൺഗ്രസ് പാർട്ടിക്കെതിരായ നാഷണൽ ഹെറാൾഡ് കേസിൽ മുൻ അധ്യക്ഷ സോണിയ ഗാന്ധിക്കും മുൻ അധ്യക്ഷൻ രാഹുൽ ഗാന്ധിക്കുമെതിരെ എൻഫോഴ്സ്മെന്‍റ് ഡയറക്ട്രേറ്റ് കുറ്റപ്പത്രം സമർപ്പിച്ചു. ദില്ലി റൗസ് അവന്യൂ കോടതിയിലാണ് ഇ ഡി കുറ്റപ്പത്രം സമർപ്പിച്ചത്. ഈ മാസം 25 നാകും കേസ് കോടതി ഇനി പരിഗണിക്കുക. സാം പിത്രോഡയുടെ പേരും ഇ ഡിയുടെ കുറ്റപത്രത്തിലുണ്ട്.
നാഷണൽ ഹെറാൾഡ് പത്രത്തിൻറെ ഉടമസ്ഥരായ അസോസിയേറ്റഡ് ജേർണ്ണൽസിന്‍റെ കോടികൾ വില വരുന്ന ആസ്തി സോണിയയും രാഹുലും ഡയറക്ടർമാരായ യംഗ് ഇന്ത്യൻ എന്ന കമ്പനിയും ചേർന്ന് തട്ടിയെടുത്തുവെന്ന ബി ജെ പി നേതാവ് സുബ്രഹ്മണ്യൻ സ്വാമിയുടെ പരാതിയിലാണ് ഇ ഡി കേസെടുത്തത്. കേസിൽ സോണിയയെയും രാഹുൽ ഗാന്ധിയെയും നേരത്തെ ഇ ഡി ചോദ്യം ചെയ്തിരുന്നു. കോൺഗ്രസിനെ സംബന്ധിച്ചടുത്തോളം ഏറെ നിർണായകമാണ് നാഷണൽ ഹെറാൾഡ് കേസ്. ഇ ഡിയെ ഉപയോഗിച്ചുള്ള രാഷ്ട്രീയ വേട്ടയാടലാണ് കേസെന്നാണ് കോൺഗ്രസ് ആദ്യം മുതലേ പ്രതികരിച്ചിട്ടുള്ളത്.
