വാഷിംഗ്ടൺ: യമനിലെ ഹൂതികൾക്കെതിരെ അതികഠിനമായ ആക്രമണവുമായി യുഎസ്. ബുധനാഴ്ച രാത്രി രാജ്യത്തിന്‍റെ വിവിധ ഭാഗങ്ങളിൽ നടന്ന യുഎസ് വ്യോമാക്രമണത്തിൽ ആറുപേർ കൊല്ലപ്പെട്ടു. നിരവധി പേർക്ക് പരിക്കേറ്റിട്ടുണ്ട്. മൻസൂരിയ ജില്ലയിലെ ഹുദൈദ ഗവർണറേറ്റിലാണ് നാലുപേർ കൊല്ലപ്പെട്ടത്. ഹജ്ജ, സഅദ, സൻആ തുടങ്ങിയ മേഖലകളിലും ആക്രമണമുണ്ടായി. സഅദയിൽ 17 തവണയാണ് വ്യോമാക്രമണം നടന്നതെന്ന് ഹൂതികൾ അറിയിച്ചു.
ഹുദൈദയിലെ റാസ് ഇസ തുറമുഖത്തും ഇബ്ബ് ഗവർണറേറ്റിലെ ജബൽ നാമ പർവതത്തിലും ഓരോരുത്തർ കൊല്ലപ്പെട്ടിട്ടുണ്ട്. രണ്ടാഴ്ചയിലേറെയായി ഹൂതികൾക്കെതിരായി യു.എസ് നടത്തുന്ന ബോംബിങ്ങിൽ ഇതുവരെ 67 പേർ മരിച്ചുവെന്നാണ് കണക്ക്. ചെങ്കടലിൽ നങ്കൂരമിട്ട യുഎസ് യുദ്ധവിമാന വാഹിനിയായ യുഎസ്എസ് ഹാരി എസ് ട്രൂമാനിൽനിന്നാണ് ഹൂതികൾക്കെതിരെ വ്യോമാക്രമണം നടത്തുന്നത്. അതേസമയം, യുഎസ്എസ് ഹാരി എസ്. ട്രൂമാനെ ലക്ഷ്യമിട്ട് വീണ്ടും ആക്രമണം നടത്തിയെന്നാണ് ഹൂതികളുടെ അവകാശവാദം.
